۱۳۹۶ ینجی ایلین ایلک آیلاریندا (جعفر) آدلی بیر آرخولوق بیزیمله بیرگه اوْتاق دا تبریز دوستاغیندا محبوس ایدی. اوْ کیشی دئییردی: 6 یاشیندا دایی سی قیزی بیرینجی ایل مکتب ده بو اوْلایی گئرچک دن یاشاییب. من ایسه اوْنون رئال خاطره سینی ( کؤکب یئددی یاشیندا قارا چارشاب باشیندا...) قالیب ده، شعره چئویردیم.

کولت.آذ گونئی‌لی تانینمیش شاعیر و میللی-مدنی فعال حبیب ساسانیانین تبریز زندانیندا یازدیغی شعری اوخوجولارا تقدیم ائدیر:

(مکتبین ایلک گۆنۆنده)

مکتبین ایلک گۆنۆنده

سارای مکتب اؤنۆنده

الده اوْخول چانتاسی

یوْلا سالدی آناسی

اوْخوماق سئوینجیله

یازی ـ پوْزونو بیله

جیزما قارانی بیر آی

ساووردو هامیا تای

اؤیرتمن ایکینجی آی

دئدی: دور گؤرۆم سارای

آغاجی گؤسته ره رک

سوْروشدو بو نه؟ گؤرک

سارای دئدی: اؤیرتمن

آغاجی تانیمام من؟!

اؤیرتمن آجیقلاندی

سارایین دیلین داندی

دئدی: نه آنلامازسان!

بو { درخت } دی! ائشیت ـ قان

سارایین گؤزۆ دوْلدو

سانکی قیزیل گۆل سوْلدو

اؤیرتمنین سؤزۆندن

آخیتدی یاش گؤزۆندن

قان ـ یاش لا اۆز بَلشدی

اوْ سوسمادی، دیرشدی

اینام خوْل ـ بوداق آچدی

{درخت} نه دی؟ ! آغاج دی

اؤیرتمن اوْ اوشاقجا

دۆشۆنمه دی، قانمادی

اوْنون اۆرک سؤزۆنۆ

وئجینه ده سانمادی!

سارای دئدی: بیز دۆنن

آغاج دان کۆی گئتمیشیک

سن دئییرسن نئچه ایل

بیلمه ییب سهو ائتمیشیک؟

من بیلدییم دۆز سؤزۆ

یانلیشلا دَییشمه رم

آغاجدی کی ـ آغاج دی

درخت ـ میرَخت بیلمه رم

سن بیزی یانالتماغا

بورا یوْلون سالمیسان

دیلیمیزی دانماغا

سؤیله نئچه آلمیسان؟