کولت.آذ آذربایجانین گؤرکملی شاعری نصرت کسمنلی‌نین شعرینی تقدیم ائدیر:

دؤنه‌جیین یوللارا کؤز دۆزدولر
سئوگیمیزدن بیرجه اوْوۇج کۆل قالار
گؤزلریمدن خاطره‌لر سۆزولر
گئدیرسن سه گؤزلریمی آل آپار

آیریلیرسان سیزلامازمی اۆره‌ییم؟
حسرتین، هجرانین باغریمی یارار
آغلاماقدان کوْر اولاجاق گؤزلریم
گئدیرسن سه گؤزلریمی آل، آپار

تنها اۆره‌ییمی یادلار قوْواجاق
سئوگی باغیم گۆندن-گۆنه سولاجاق
یوللاریندا گؤزوم دوْنوب قالاجاق
گئدیرسن سه گؤزلریمی آل، آپار

سنـسیزلییه سیرداش، کؤلگم اولاجاق
تنها اللریمی یئللر توتاجاق
اؤلسم ده گؤزلریم آچیق قالاجاق
گئدیرسن سه گؤزلریمی آل‌، آپار

خیالینی کیپریییمدن آسارام
اللرینی توتان اولسا یانارام
باشقاسینا باخسان گؤزسوز قالارام
گئدیرسن سه گؤزلریمی آل، آپار

دئمیرم محو اولوب، یوخ اولاجاغام
عمرومه دیرَکدین، ییخیلاجاغام
سنلی گۆنلریمه آغلایاجاغام
گئدیرسن سه گؤزلریمی آل، آپار

یاتمیرام یوخودا آغلارام دئیه
هر سحر هجرانی دادارام دئیه
شکلینه باخماسین کور اولار دئیه
گئدیرسن سه گؤزلریمی آل، آپار

سئودا بیر آغاجمیش، باری حسرتمیش
اَییلمز غرورو، سئوگی اَیَرمیش
اۆرک آغریسینی گؤزلر چکرمیش
گئدیرسن سه گؤزلریمی آل، آپار ..