کولت.آذ صمد بهرنگی‌نین یازیسینی محمد عابدین پور-ون چئویرمه‌سیله اوخوجولارا تقدیم ائدیر:

قارلی بیر گونده پنجره‏‌دن ائشییه باخیردیم. قار دنه ‏لری اوینایا-اوینایا گلیب هر بیر زادین اوستونه قونوردولار؛ شریتین اوستونه، دووارلارین، کردینین قیراغینداکی آفتابانین، هر بیر زادین.

ایری قار دنه‏‌لری پنجره‏‌یه ساری گلیردی. الیمی ائشییه اوزالدیب بیر قار دنه‏سی‌نین آلتینا توتدوم. قار دنه‏‌سی یاواشجا الیمده اوتوردو. آغ-آپباغ، تر-تمیز ایدی! نه قده‌ر گؤزه‌ل شکیلی، دوزه‌نلی بیچیمی وار ایدی! اؤز-اؤزومه دئدیم:

-کاش بو قار دنه‏‌سی‌نین دیلی اولایدی، باشینا گلن‌لری منه سؤیله‌یه‌یدی.

بیردن قار دنه‏‌سی سسله‏‌نیب دئدی:

-منیم حئکایه‏‌می بیلمک ایسته‏‌سن، قولاق آس سنه دئییم:

"من نئچه آی بوندان قاباق بیر سو داملاسی ایدیم. خزه‌ر دنیزینده‏‌یدیم. میلیاردلار میلیارد داملا ایله یاناشی اویان- بویانا گئدیب، گونومو گئچیردیردیم. یای گونلرین بیرینده دنیزین اوزرینده گزیشیردیم. ایستی گونش شاخارکن، قیزیشیب بوغلاندیم. مین‌لرجه داملا من‌له بیرلیکده بوغلاندیلار. یونگوللوکدن قانادلاناراق اؤز-اؤزوموزه یوخاری گئدیردیک. یئل آرخامیزا دوشه‌رک بیزی هر بیر یانا آپاریردی. او قده‌ر یوکسه‌لدیک کی، داها آداملاری گؤره‌نمه‏‌دیک. هر بیر طرفدن بوخار کومالاری گله‌رک بیزه یاپیشیردیلار. هردن ده بیز گئدیب بؤیوک کومالارا یاپیشیردیق. بیر-بیریمیزه گیریب باسیلاراق سیخلاشیردیق. سونرا یئنه یوکسه‌لیردیک. اوزاقلارا گئده‌رک چوخالیب، داها کومالاشیردیق، داها سیخلاشیردیق. هردن گونشین قاباغینی توتوردوق. هردن‌سه آی‌لا اولدوزلارین اؤنونو آلاراق گئجه‏‌نی داها قارانلیق ائدیردیک.

بعضی بوخار ذره‏لرین دئدییینه گؤره بیز بولود اولموشدوق. کولک بیزه گیردیکده بیزدن عجیب-غریب شکیل‌لر دوزلدیردی. دنیزده اولان چاغلاریم‌دا بولودلاری دَوه، آدام، ائششک هابئله آیری شکیل‌لرده گؤرموشدوم.

نئچه آی گؤیده دیدرگین اولدوغوموزو بیلمیرم. بیز چوخ یوخاریلارا گئتمیشدیک. هاوا سویوموشدو. بیر-بیریمیزین ایچینه سیخیشدیقدان ال-آیاغیمیزی اوزالدا بیلمیردیک. بیرلیکده حرکت ائدیردیک. هارایا گئتدییمیزی بیلمیردیم. یان-یؤوره‏می‏ ده گؤرموردوم.

گونش‌دن خبر یوخ ایدی؛ سانکی گونشین اؤنونو اؤزوموز توتموشدوق. آلانیمیز گئنیش ایدی. ائنیمیزله بویوموز، نئچه یوز کیلومئتره اولاردی. یاغیش اولوب یئره دؤنمک ایسته‏‌ییردیک. یئره قاییتماق اوچون جان آتیردیم. بیر مدت کئچدی. یاریمیز سو، یاریمز بوغ ایدی. یاغیش اولماقدایدیق. هاوا بیردن ائله سویودو من تیتره‌دیم. هامی تیتره‌دی. چئوره‌مه باخدیم. بیرینه: "نه اولوب؟" -دئیه سوردوم. او ایسه دئدی:

-"بیزیم اولدوغوموز یئرین بو بؤلومونده ایندیلیکده قیش‌دیر. باشقا بؤلگه‏لرده ایندی ایسه هاوا ایستی ده اولا بیلر. بو سرت سازاق داها قویماز بیز یاغیش اولاق. باخ! من قار اولماقدایام، هابئله سن‏ده..."
یولداشیم سؤزونون آردینی توتا بیلمه‌دی. قارا دؤنوشوب یئره دوغرو یوللاندی. اونون آردینجا من‌له مین‌لرجه قار دنه‌‏لری آردی-آردینجا قار اولوب یئره یاغدیق.

دنیزده اولارکن آغیر ایدیم. ایندی ایسه یوپ-یونگول ایدیم. بیر یئلک کیمی گؤیده اوچوردوم. سویوغو دا هئچ بیلمیردیم. سویوق آرتیق وجودومون بیر بؤلومو ایدی. اوینایاراق یئره دوشوردوک.

یئره یاخینلاشارکن، تبریز شهرینه دوشدویومو گؤردوم. خزه‌ر دنیزیندن نه قده‌ر اوزاقلاشمیشدیم؟!

گؤیدن بیر اوشاغی گؤردوم. او اوشاق بیر ایتی، ده‌یه‌نک‌له دؤیوب ونگیلده‎دیردی. گؤردوم بئله گئتسم، بئلنچی بیر اوشاغین دوز باشینا دوشه‏‌جه‌یم. کولک‏دن ایسته‏دیم منی قورتاراراق آیری بیر یئره گؤتورسون. کولک منی گؤتوروب بورایا گتیردی. سن الینی منیم آلتیما اوزادارکن سندن خوشوم گلدی و...

بوردا قار دنه‏‌سی‌نین سسی کسیلدی. باخدیم گؤردوم سو اولوبدور.