Kult.az بختیار واهابزادنین "بیر سلاما دیمه‌دی" شعیرینی تقدیم ائدیر:

بو گون من سنی گؤردوم،
سلام وئرمک ایستدیم،
اوزونو یانا توتدون.
سؤیله، ایللردن بری
قلبیمیزین بیر دویوب
بیر ووردوغو ایللری،
آخی، نه تئز اونوتدون؟
بئش ایلده گؤزوموزدن آخان او قانلی سئللر،
بیر سلاما دیمه‌دی؟
هئچ اوزومه باخمادان یانیم‌دان نئجه کئچدین؟
سن عشقین سلامینی قورخویامی دییشدین؟
یوخ‌سا سن اؤز اهدینه، ایلقارینا آغ اولدون؟
او قدر یاخین ایکن، بو قدر اوزاق اولدون.
شیرین گولوشلریمیز، آجی فغانلاریمیز
بیر سلاما دیمه‌دی؟
قایغی‌لی آنلاریمیز، قایغی‌سیز آنلاریمیز
بیر سلاما دیمه‌دی؟
سن نئیلدین، بیر دوشون!
یالنیز ایندی آنلادیم؛ آه، سن داها منیمچون
الچاتماز بیر چیچکسه‌ن،
یاشانمیش گونلریم تک گئری دؤنمه‌یه‌جکسه‌ن!…
قوپ ای توفان، اس ای یئل! خزل اولوم، تؤکولوم
دوز بئش ایل اورییم‌ده
بسلدییم محبت، بیر سلاما دیمه‌دی.
بیر گونلوک حسرتیمه دؤزه بیلمه‌یه‌ن گولوم،
بس نه اولدو؟ بو حسرت بیر سلاما دیمه‌دی؟
گئتدین، دالینجا باخدیم، جان آیریلدی جانیم‌دان،
سن نئجه ائتیناسیز اؤته بیلدین یانیم‌دان؟
آه چکدیم، باشیم اوسته یارپاقلار اسدی، گولوم،
سنین قلبین اسمه‌دی.
آرخانا دا باخمادین!
نیه سنین یولونو محبتین کسمه‌دی؟…
قازانجیمیز ده، بومو؟
دئییلممیش او سلام الویدامیز اولدومو؟
سن منه ظلم ائیلدین، منه ظلم یاراشیر.
بیر سلاما دیمه‌یه‌ن عشقه اؤلوم یاراشیر!