کولت آذ آذربایجانلی گنج شاعر آیشن رحیم-ین شعرینی تقدیم ائدیر:

کوچه‌لر اوغورلاییر یوخولاریمی...
حسرت آغاج کیمی کؤک سالیب،
قورو باخیشلارین کیمی اؤلور...
کیمسه‌سیز خاطره‌لرده‌ کی سَپَله‌نیر گؤی اوزونه...

گل دونَنه بیر آددیم آت
...ومنی قایتار اؤمرونون اوولینه.
کور قارانلیقدا اومودلاریم یاپیشسین
ووسالینین بارماغلاریندان،
سون باهارا بورونموش روحومدا
ایشیق آستاجا یاغیشین آغاجلارا...
دؤنوشونله یارپاقلار رقص ائتسینلر.

...آیریلیغین گؤزلریندن پرده‌نی چکیب
یالنیزلیغین اوزونو گؤر
ایندی بوکدویوم گئجه‌لر
سنین گؤزلرینده گیزله‌نیب،
آی ایسه ساچلاریندا...

بیرجه تسللی یاستیغیمداکی اؤپوش ایزین ایدی،
اونو دا گؤز یاشلاری قوجاقلادی.
ایندی قاپی‌نین آرخاسیندا دایانیب
یاشادیغیمیز گونلر...
قوجالیر پنجره کناریندا گولوشلر
...و سنین گؤزلرینده گئجه‌له‌ییر.