کولت.آذ ووقار نعمت-ین حکایه‌سینی اوخوجولارا تقدیم ائدیر:

ساعاتی صوبح آلتی‌یا قوروب، باشی‌نین آلتینا قویوب یاتاغا اوزانیرسان. بوتون ملزمه‌لرین حاضیردیر. سنه دوشن؛ یاغمورلوق، داغ آیاق‌قابیسی، گونش گؤزلویو، شاپقا، ال فنری‌، چتیر و ...دیر. هامیسی‌نی ییغیب حاضیر قویموسان. ال آتیب چانتانی گؤتوروب چیخاجاقسان. دوز ساعات یئددی‌ده دربند باشیندا اولمالی‌سان. اونلار سنی گؤزله‌ییر. گئج قالمامالی‌سان.

یوخویا گئتمه‌میش یوخو گؤرورسن. بیر کؤلگه سوووشور پنجره اؤنوندن. اؤزونو آلدادیرسان. «یعقین گؤزلریم بؤیودو!..» «تک‌لییین قاراباسماسی دا اولا بیلر!..». بیریسی ائحمالجا آچاری قاپی‌یا سالماغا چالیشیر! میسینی چکیب اؤلو کیمی دایانمیسان یاتاق‌دا. او، آچار یئرینی تاپا بیلمه‌ییب هله. قاپی جیرماقلانیر. هه!... ایندی تاپدی. آچارین فیرلانماسینی ائشیدیرسن. «منیم ائویمین آچاری بوندا نه گزیر، بو کیم‌دیر؟!...» آچاری اوچ دؤنه بورموسان قیفیللایاندا. ایندی ساییرسان: بیر، ایکی، ... «یوخ!... ناحاق قورخویا سالیرام اؤزومو!». دئییرسن. -«یقین یوخو گؤرورم!..». اؤزووه شاپالاق ووروب، اؤزونو اویاتماغا چالیشیرسان. تَر ایچینده ایتمیسن.

اوز-گؤزو قیریشلی، گؤزلری نورلو، بئلی دونقا بیر قوجا کیشی‌دیر. نهایت قاپینی آچیب ایچه‌ری گیریر. اوپ-اوزون قوللاری وار. ائله‌کی، یئرله سورونور اللری. هئچ یئره باخمادان دوز گئدیر کیتاب‌لارین اوستونه. بوتون کیتاب‌لارینی ورقله‌ییر. دوداقلارینین آلتیندا بیر شئی‌لر سؤیله‌ییر. بیلمیرسن نه دئییر. آما سسی سنی قورخودور. یامان-یاووزا اوخشار بیر شئی‌لر سؤیله‌ییر.

«ایش بونلاردادیر». «بونلار شئیطان شئیپورودور» -دئییر.

نه دئییر؟!.. باش چیخارانمیرسان. گولور.

«تاپاجاغام» -دئییر.

سطیر-سطیر آختاریر. بیر تیتر یازی کیمی قارالیر اوزاقلاشیر کیتاب‌لار ایچینده یوخ اولور. گؤردویون کیمی.

بیر سس ائشیدیرسن. شاققا چکیب گولور کیتاب‌لارین ایچیندن.

-«تاپدیم!..».«تاپدیم!..».

سنین دیلین باتیب آرتیق. چیغیرماغا چالیشدیقجا دا، ایتیریرسن سسینی. دینمه‌یه گوجون چاتمیر. دَیه‌جک قالمیسان. گؤزلرینه و قولاق‌لارینا اینانمیرسان. هئچ بیریسی سنین ایختیاریندا دئییل. ایندی کیتاب‌لاردان هردن بیر، بیر سس قالخیر. گولوش سسی، چیغیریش سسی، چاغیریش سسی. قایالارین اوچوب آغناماسینا بنزه‌ر سس‌لر. گؤی گورولتوسونا بنزه‌ر خاریلتیلی بیر سس‌لر. خارا-خار سورونور بئینی‌نین قات‌لاریندا. «های...»دئیَن بیر چاغیریش سسی عکس اولوب قالیر بئینینده. سن هاچان ائنمیسن بو دَره‌یه؟! صادا عکس اولور: «ها...ها...ها...ها...،

هئ... هئ... هئ ...هئ...،

هی... هی... هی... هی...

هو...هو...هو...هو...،

هی... هو... ها... هئ...،

هئ... ها...هی ...هو...».

هر بیر آغ نوتون آردی او بیری نوتو دئیه‌نه قده‌ر دؤرد نوت بویدا اوزانیر. بو سمفونیک سسی بئش دؤنه ائشیدیبسن ایندییه قده‌ر. یادیوا گتیریرسن. بو سس تاپیلان کیمی ده، کوره‌یینجه بیر دسته آدام چیخیر او دره‌نین یاخاسی یوخاری، سو یوخاری گئدیرلر. هامیسی دا آغ گئیینیب. «آغ کؤینک» دسته‌سی کیمی. تپه‌دن دیرناغا قده‌ر آغ. چییین‌لرینده بیر اؤلو آپاریرلار. تانیش بیر اؤلودور. سن اؤلونون اؤزونو گؤرمورسن، تانیش‌لیغینی گؤرورسن. گؤزون گؤره-گؤره ده یوخ اولورلار.

اؤزونه زور ووروب اویانینجا همن قوجا کیتابخانانین قاباغیندا دایانیب. شاققا چکیب گولور. -«هاهاهاها...»

بو سسین داوامیندان قورخور، قولاقلارینی تَپیب، گؤزلرینی یومورسان. آمما یارارسیزدیر. سانکی سنین اؤز ایچیندن قالخیر بو قورخونج سمفونیک سس.
ایندی سن قوجانین دوغرو اولدوغونا اینانمالیسان، اؤزونه شک ائدیرسن. قوجا سنه یاخین‌لاشیب:

ـ «ساعاتی سنین اؤلومونه قورموشام، دوز ساعات آلتی‌یا. او چالاندا سن اؤله‌جکسن. یوخویا قالمایاسان ها!... ائشیتدین؟!... یادیندان چیخماسین. دوز آلتی‌دا اؤلرسن. ائشیتدین؟!...»

ـ «نییه اؤلمه‌لی‌یم کی؟!...».

دئمه‌یه گوجون یوخدور، قلبیندن کئچیر.

ـ «نییه یاشامالی‌سان کی؟!»

ـ« هر شئی اوچون».

یئنه قلبیندن کئچیر.

-«هاه هاه هاه هاه... آاااه هاه هاه هاه...»

هاوادا آددیملایاراق شاققا چکیب گولور. گؤزلریندن چینقیل، داش، قوم تؤکولور یئره.

- «آغلیوا کئچه یاماییم!.. هئچ شئی اوچون اؤلمک، هر شئی اوچون یاشاماقدان قات قات اوستوندور کی!... ها.. ها... ها....ها.....»
داها دینمیرسن باشینی آشاغی سالیب قاپی‌دان چیخیر. نفسینی دَییشیر. راحاتلاشیرسان. سیرا ایله دوزولوب داغا چیخیرسیز ایندی. داغچی‌لارین لاپ باشینداسان. داغچی‌لارین باشچیسی.

بایراغیزی داغین زیروه‌سینه تاخیرسیز. شاشیریب قالیب‌سان."چیخاندا آلتی نفر ایدیک! ایندی میللت دالغالانیر! داغچی‌لارین بیری چیغیریر: -«ساعات آلتی‌دیر.» آلتی دئیه‌نده دیکسینیرسن. « نییه زنگ وورمادی بس؟!»

داوامی وار...