کولت.آذ گونئی‌لی شاعر و یازیچی حبیب ساسانیان-ین شعرینی تقدیم ائدیر:

قوْرخورام قیامت ده، آیری سئچگیلیک اوْلا

قوْرخورام چوْخ انسانا، شئیطان مارکی وورولا

قوْرخورام. قوْرخماغیما، چوْخلو نه دنلریم وار

گؤره سن قیامت دن، گلیب گئدنلریم وار؟

قیام قیامت ائتسه، ایسته میرم من اؤلم

قیر قازانی ـ جهننم ـ اوْدلو کؤسئیی گؤرم.

دۆشۆنۆرم اوْرادا، بو دۆنیانین تایی دیر

جننت حیاسیزلارین، اوتانمازین پایی دیر

میر غضبین دیلیندن بیزیم خبریمیز یوْخ

باشقا دیلده دانیشسا، اوْردا ـ بوردان ظولوم چوْخ

ملک لر ـ فرشته لر، فارسیجا قیریلداتسا

بئزراق اوْلاجاق روحوم، یئنه باتاجاق یاسا

اوْردا دیوان قورولسا، من بیرینجی شاکی یم

آللاه عادل اوْلارسا، گرک سؤزۆمۆ دییه م

دییه م؛ آنا دیلیمی، وئردین ـ مکتب وئرمه دین

ایسته دیم دوستاق اوْلدوم، نه دن منی گؤرمه دین؟

عدالتین هاردای دی؟ من سوچسوز ـ سوچلاناندا

وارلیغیمی ـ دیلیمی، باشقالاری داناندا !

هاردای دی عدالتین؟ بیت المالی ییه نلر

گئجه ـ گۆندۆز منبرده، بیزه ناغیل دییه نلر

دَوه دنگه نه سی له، کانادا یا گئدیردی

آفتافا اوْغروسونون بارماغین قطع ائدیردی...

گؤرمۆردۆن جینایتی؟ یا یوخویا دالمیشدین؟

بابک زنجانی لر دن، سن ده رۆشوه آلمیشدین؟

آنا دیله، سمینار ـ کنفرانس لار قوراندا

سن هاردای دین حراست، بیزه قان اوددوراندا؟

ایران دا دوْغولماغیم، اؤز اَلیمده دگیلدی

آزادلیق اوغوروندا، بئل ـ بوخونوم اَگیلدی

قورآنیندا دئییر سن: مؤمن ظولما اَییلمز

سنین ایزنین اوْلمادان، یارپاق بوداقدان ائنمز !

سنکی قادر دگیلدین، ظولما قارشی دوراسان

عدالتسیز حاکمین قولاقلارین بوراسان

صاف اۆرکلی چیرکینلر یاراداندا دئمه دین؟

عذاب چکر اؤلۆنجه، عدالت لی! آلا دین...

آز دگیل اوْ دۆنیادا، ایت کؤکۆنده یاشاتدین؟

حاکم ائتدین اؤزگه نی، منی ـ من دن بوْشالت دین

بو سوچلارا بیرینجی اؤزۆن جواب وئر گؤرک

اؤزۆن گئت جهننمه، سَرینله سین بو اۆرک

"یاکاموزام " گرکیر اینامیم دا برک دورام

من اؤلمک دن قوْرخمازدیم، ایندی داها قوْرخورام...