کولت آذ ووقار نعمت-ین حیکایه‌سینی تقدیم ائدیر:

دوغا یوروشونو، اۆزمه‌یی، گئری‌ده قویموسان. ایندی تکجه بو دؤنَمی سووشمالی‌سان."ایپ‌له کئچیش."

بیر درین دره‌نین آراسیندا داغدان-داغا اوزانان کندیر یولونو کئچمه‌لی‌سن. کئچیرسن. او قوجانین گولوش‌لرینه سؤیکه‌نه-سؤیکه‌نه کئچیرسن."سس‌لرله ده دَنگه ساغلاماق اولارمیش." -دئییر و ایپ اوسته قاچیرسان. قوجا کیشی‌لر ساحیل قفه‌ده اوتوروب چایلاشیر، قلیانلاشیرلار. یوخونو اونوتموسن. قورخون بیر آز تؤکولوب. یادا اؤزونو اونوتموسان. فقط یایالیب ایپی بوینونا سالمامالیسان! باشیندان توتوب باسیر.

-«سن یاتاسان گره‌ک. آلتی‌دا دورمالی‌سان. اؤلومو یوخویا قالمامالی‌سان. یات!»

دونیانین اََن اوجا و آجی سسی‌دیر بو آن ساعات عقربلری‌نین سسی. یوخون قاچیر. بوتون گوناه‌لاری ساعاتلارین و ایشیق‌لارین بوینونا ییخیر، دورور اوتورور، یاتماغا قورخورسان ایندی. ساعاتا باخیرسان ساعات دوز آلتی‌یا قورولوب. ساعاتا اینانمیسان آرتیق. -«اولمک اولمک‌دی خیریلداماق نه‌دی.» اَلینه بیر پیچاق آلیب قوجانی گودورسن.

قاپی آچیلیر. پیچاغی قووزاماغا گوج یوخدور قولوندا.

«ساعاتی آلتی‌یا قورموشام، یوخویا قالمایاسان اؤلومو» -دئییر، چیخیر گئدیر.

سن بوتون کیتابلاری گزیرسن. پیچاق الینده گزیرسن. قوجانین گولوش سس‌لری دووارلاردان داشلانیب توکولور آشاغی. کیشی‌نین گؤلوش‌لرینی پیچاقلاییرسان کیتاب‌لارین آراسیندان قان آخیر. کیتاب‌لاری یئر تاپیب قویلامالی‌سان. قویلاییرسان. ساعات بئش اولوب یاتماغا قورخورسان. نییه ساعات آلتی؟! بیز ده آلتی یولداشیق! اولمایا ساعاتدا بیری پیچاقلانیر؟! اولمایا من آخیرینجی اؤلویم؟!

-«اونوتمامالی‌سان. بیلدین نه دئییرم؟! دوز آلتی‌یا قورموشام ساعاتی، دوز آلتی‌دا اؤلمه‌لی سن. بیلدین؟!... اونوتمایاسان ها؟!... هئچ شئی اوچون اولمک، هر شئی اوچون یاشاماقدان یئی‌دیر.»

دوغوم گونون داغدا قوتلانیر. قیز دوستون آلدیغی ساعاتی قولونا باغلاییر. شن‌لیک قیشقیریغی قوپور. اَل چالینیر. دوداغیندا یوموشاق بیر گولوش ساعاتا باخیرسان.
قیز اَییلیب قولاقلارینا نسه پیچیلداییر. کولرنگی بیر گولوش گویه‌ریر دوداقلاریندا.

«اؤلومو اونوتماسان یاشاماق نه قده‌ر چتین‌دیر» -دئیه دوشونورسن. ساعاتی قیزا گئری قایتاریرسان اوزو آشاغی باش گوتوروب قاچیرسان. بوتون ساعاتلاردان قاچیرسان. اؤلمه‌مک اوچون اؤلورسن ایندی.

بیر کؤلگه آغیرلیغی قاپی‌دان چکیلیر. حیه‌طین بوجاغینا قیسیلیب قالیر. آیاغا دورماغا قورخورسن. دان یئری آغاردیقجا دا کؤلگه اَری‌ییب ایتیر. یوخا چیخیر. سنین قورخون کیمی. آمما چکیلمه‌ین بیر کؤلگه بئینینده سوله‌نیر هله. قورخونج وسمفونیک بیر گولوش سسی‌نین کولگه‌سی: «ها.. ها... ها....ها...، هئ.. هئ... هئ....هئ...، هی.. هی... هی.... هی...، هو.. هو... هو.... هو...».

سن او دره‌یه باخیرسان. ایندیجه سو یوخاری گلرلر اونلار! او آغ کؤینک دسته‌لرینی گؤدورسن. آلتینجی اؤلونو آپاراجاق‌لار بودؤ‌نه... سنی هئچ بیر معجوزه یاشادا بیلمز! سن ساعاتا اینانمیسان آرتیق. آنجاق همن بو ساعاتین گتیردییی یئددینجی اؤلو ده وار. او دا اؤلومون اؤلوسودور. بیر آغ کؤینک دسته‌سی اؤلومون اؤزونو اؤلدوره‌جک و بو دره یوخاری آپاراجاقلار. توم ملزمه‌لری ائوده قویوب چتیری گؤتوروب ائودن چیخیرسان. قیرمیزی بیر یاغیش یاغیر. بئله قیرمیزی بیر یاغیشی ایلک دفعه‌دیر گؤرورسن. گئتدیکجه خوشونا گلیر. چتیری آتیب ایسلانماق ایسته‌ییرسن. آغاجلاری باشین اوسته باش-باشا گلمیش بوم-بوش و اوزون-اوزادی بیر خیاباندیر. قارانلیغین ایشیغی گلیر پنجره‌لریندن. باشدا بیر گونش گؤزله‌ییر سنی. اوردا قورونمالی‌سان آرتیق...