کولت آذ گونئی‌لی گنج شاعر رحیم خانی‌نین شعرینی تقدیم ائدیر:

سؤزلریم قورتاریب باخیشاق بیراز
گؤزومدن سؤزومو اوخو سئوگیلیم
باخیشیم اۆزوندن تؤکولسه بیر-بیر
ساچینی بیر شعر توخو سئوگیلیم

پلیس لر سئوگیمی آنلایاجاقلار
الیمده ساچیندان بیر گیله قالیب
قرآنی پای ائتدیک هر سؤزوموزه
آندیمیز کیم بیلیر انجیل-ه قالیب

دۆن گئجه او پارکدا اؤپوشوموزو
گۆزگوده اۆزومه، گۆلور دوداغیم
جهنم یازیلیب قَدریم آنجاق
جنتین دادینی، بیلیر دوداغیم !

گؤزلرین دئییرکی منی سئویرسن
دوداغین چالیشیر ایز ایتیرمه یه
جانیمی آلدیغین هر دقیقه‌نی من
کلمه دیر گزیرم سؤز ایتیرمه یه

من سنین گؤزونده سئوگینی گؤردوم
باخیشیم اودورکی سۆزولور سنه
شعرین سؤزونو ساچیندا هؤردوم
اودورکی اۆره‌ییم اۆزولور سنه

من سنی تانریدان پای آلمیشام کی
سنی تانری-لارا اینان ساتمارام
او قدر من سنه دۆیون یئمیشم
اؤزونده ایسته‌سن سنی آتمارام