Kult.az روقیه کبیرینین "آیاق اوسته یازیلار" آدلی حکایه‌سینی تقدیم ائدیر:

هندوستاندا دوشونجه دیواریندا

یازمیشدی: «گؤزلریوی یوم و آلتی‌یوز اییرمی کیلومتر اوزونلوغوندا چییین چییینه دایانمیش، اورتاعصرلره دؤنمییه‌جه‌ییک باغیران قادینلاری تصوور ائله.»

گؤزلریمی یومدوم. تبریز دروازاسیندان باشلاییب، تهرانین آزادی مئیدانیناجان قادین دوزدوم. ذهنیمده دوزدویوم صفه باخدیقجا گؤزلریم قارالسا دا، دوداغیما تبسّوم قوندو. آمما بو قادینلاری شماتت ائدیب، داشا باغلاییب، پیچقلایان سنّتی جماعت (ائرکک- قادین) یادیما دوشنده، خوش خیالیما جیزیق چکیلدی.

فیزیولوژیک باخیمدان هر هانسی بیر مؤنث انسان حامله اولمادیغی شرط ایله بلوغ یاشیندان یائسه‌لیک یاشیناجان هر آی معیّن گونلرده آی باشی(دشتان- پریود- منوره) اولوب، اوچ تا یئددی گون بویوندا بطن‌ین آندومتر غشاسی تؤکولمه‌یه باشلاییب، بطن‌ده قان‌آخما اوز وئریر. قادین حامله اولدوغوندا جنین ائله همن بو نجیس دئییلن آندومترین احاطه‌سینده آمنیوتیک کیسه‌سینین ایچینده بوی آتیب، کامیلله‌شیر.
بعضی دین‌لر و آیین‌لاره گؤره قادین وجودو آی باشی اولان گونلر و هندو راهیب‌لرینه گؤره قادین آی‌باشی اولدوغو اوچون وجودو هر زامان نجس‌دیر و معبد کیمی مقدس مکانلارا آیاق قویماغی یاساقلانیر. ایندیسه قرن‌لر سونرا ایکی قادین بو یاساقلیغی سیندیریب و آرخالاریندا آلتی‌یو‌ز اییرمی کیلومتر اوزونلوغوندا محتشم بیر دوشونجه صفی چکیلیب.

گؤزلریمی آچماغیم گلمیر. هندوستانین کرالا ایالتینده صف چکیلمیش قادینلارین سئل گوجو ذهنیمه چیرپیلیر. خیالدا دوزمه دوزمه‌یه نه وار کی! یئنه آلتی‌یوز اییرمی کیلومتر اوزونلوغوندا، تبریز دروازاسیندان تا تهرانین آزادی مئیدانینا جان رنگ به رنگ ساری گئیینمیش هندو قادینلارینی چییین چییینه دوزورم...