Kult.az بختیار واهاب‌زاده نین- "آنا شعیری" نی تقدیم ائدیر:

نه تئز اللرینی اوزدون دونیادان،
بالانی تک قویوب هارا گئتدین سن؟
نئجه یوخ اولورموش بیر آندا اینسان،
ائله بیل دونیادا هئچ یوخ ایمیش‌سه‌ن.
گونش قوروب ائتدی... اوتاق قارالدی،
بیر آندا یوخ اولدون سن خیال کیمی.
ایندی دوشونوره‌م: سن‌دن نه قالدی،
کؤنلومده خاطره‌ن قارا خال کیمی.
منی بویا-باشا یئتیردین، آنا
بیزه بورجلو بیلدیک هر زامان سنی.
سن منی دونیایا گتیردین، آنا،
من‌سه یولا سالدیم دونیادان سنی.
سن منه بئشیک‌ده لایلای چالمیسان
بو گون لایلای چالیم سنه من‌ده‌می؟
سنین شیرین-شیرین لایلالارمی
من سنه قایتاریم جنازه‌نده‌می؟
"یوخون شیرین اولسون" - دئیردین منه،
"یوخون شیرین اولسون" - دئییم‌می سنه؟
گرک من باشینا دؤنه‌م-دولانیم،
منی حیات اوچون یاتیران آنام،
سؤیله اؤلومچون
نئجه یاتیریم
سنی من بو گون؟
بو نئجه دونیادیر،
اینسان اوغلونون
خیالی گؤیده‌دیر، اؤزو یئرده‌دیر،
ساغ ایکن چینینده حیاتین یوکو،
اؤلنده جسه‌دی چیینلرده‌دیر...
بو نئجه دونیادیر، بو نئجه دونیا،
اؤلومو حقیقت، حیاتی رؤیا.
دردیمین، قمیمین سندین اورتاغی، .
نیه اوز دؤندردین، بس نیه من‌دن؟
"دردین منه گل‌سین!" - دئیردین آخی،
نیه درد جالادین دردیمه بس سن؟..
آنام، هئچ کس سنی اینجیتممیشدیر،
من سنی،
من سنی اینجیدن قدر.
ایندی کیمه آچیم دردیمی بیر-بیر،
کیم منیم دردیمه یانار سن قدر؟
ائوین هر کونجونده گؤرونور یئرین.
گؤزوم آختارجیدیر، آنا، آی آنا،
"ننه‌م هانی؟" - دئییر کؤرپه آذرین،
من نه جواب وئریم، اونا، آی آنا؟
بیلمیرم، بیلمیرم بو اؤلوم ندیر، حیات وار
ایکن؟
نفسین، آی آنام، هله ائوده‌دیر،
اؤزون یئر آلتین‌دا داشا دؤنموسن.
بو گون یئددین اولدو...
آنام، یئددی گون،
بیزیمله برابر آغلار اوتاقلار.
سنه،
یالنیز سنه،
سنه دئمکچون
کؤنلوم‌ده نه قدر منیم سؤزوم وار.
"کیملری چاغیراق بو گون یئددییه؟"
خالالار، باجیلار سوروشور من‌دن.
آنام‌دان سوروشاق، او بیلر دئیه،
سنین اوتاغینا اوز توتورام من.
آنام، تاپشیریلدین آنا تورپاغا،
بو اؤلوم، سینه‌مه چکدی داغ منیم.
سن منیم آرخامدا بنزردین داغا،
ائله بیل آرخامدان اوچدو داغ منیم.
قیزیمین آدیدیر سنین اؤز آدین.
بو دا گؤز داغیدیر منه بو گون ده.
سون دفعه سن منه باخیب آغلادین،
صورتیم مزارا گئتدی گؤزونده...
عؤمرو باشا ووردون آلتمیش یاشین‌دا.
آلتمیشین اوستونده دوروب یاشین دا.
آرتیق سنین اوچون دایانان زامان
منیمچون دولانیر...
گون اولور آخشام.
واخت کئچیر، سن من‌دن اوزاقلاشیرسان،
من سنه گونبگون یاخملاشیرام.

ویدئودا شعیری خالق آرتیستی لاله زار مصطفی یئوانین ایفا ائدیر: