کولت آذ آقشین یئنی سئی‌-ینن شعرینی مهسا عبدلعلیزاده‌نین ترجمه‌سی ایله تقدیم ائدیر:

بدنینه توخوندوقجا کدرله-نیرم، کدرله-نیرم کی، بو گؤزللیک بیر گون حیاتدا اولمایاجاق.

اؤله-جه_یمسه، بو گؤزللی یین یئرینی تانریدان سوروشماق اوچون اؤله-جه-یم.

تانری یا- انسانی پالچیقدان، سئوگینی آیریلیقدان، آیریلیغی اؤلومدن یاراتمیش بو تانریسیزا ثبوت ائتمک ایسته-ییرم کی، سنی تاپماقدان اؤترو، یوخا چیخماقدان بئله قورخمورام.

یاشاییب سنی ایتیرمک دنسه، اؤلوب سنی تاپماقدی سئوگی- منیم اوچون.

من تانری نین یوخ، سنین یوخلوغونون آتئییستی یم.

گؤزلرین، بوتون قادینلارین گؤزلری نین معلمه سی ایدی. انسانا نئجه باخماغی اؤیره-دیردی. اللرین اوزاقلاشماق درسی کئچیردی.

چونکو بیز، انسانلاردان اوزاقلاشا-اوزاقلاشا یاخینلاشمیشدیق بیر-بیریمیزه.

سنی هامینی ایتیردی ییم یئرده تاپمیشدیم، دوکتور.

بوندان سونرا باشقاسینی سئوسن ده سئوینه-جه-یم. بیله-جه-یم کی اودا منم!

آما سن، بو بؤیدا گؤزلری نئجه، کیمین آرخاسیندا گیزله-ده-جک سن؟!

هاردان تاپاجاقسان او نهنگی؟

دانیشدیقجا آغلاماغیم گلیر، دوکتور.

باخ یئنه ده آغریییرام. ساهاتیمین عقربه سی سول قولومو سانجیب!

زامانین زهه-رینی قاتیب قانیما.

بیر انسان اؤرت اوستومه، تنهالیقدان اوشویورم!

باخ، ال چاتماز آغاجلارین باشیندا مورگوله-ین کولک اسمه-یه باشلادی یئنه، گئجه-نین قارانلیغیندان آغ-آپپاق قار یاغدی، اوشودوک و گؤیلر یئنه ثبوت ائتدی کی، سئونده قارانلیق دا آغ-آپپاق دیر.

دوکتور، هر قادین حووانین اوزاق قوهومودور... هرکیشی آدمین یاخین دوستودور.

آلما آغاجی گؤرنده اییره-نیرم، چونکو بو آغاجین اجدادی، قادینین جنت ده یئدی-یی قاداغان اولونموش مئیوه-نین معده-سینده گتیردی-یی توخومدور.

گولو آغاج اولماق آرزوسو سولدورور، بیزی تانری اولماق ادعاسی اؤلدورور.

آغاجلار تانری-نین اؤزونه باغیشلادیغی نهنگ گوللردی.

واخت واردی، اومودسوزلوغوم ده منه یاشاماق اوچون اومود وئرردی.

دوکتور، گئری دؤنمک، یئنی دن گیل-پالچیق اولماق ایسته-میرم.

منی ائله سئوکی، یئنی دن پالچیق یوخ، بیر یوللوق یوخ اولوم.

آچ قولونداکی ساهاتی، دوکتور.

گؤزللی یینی زامانا قیسقانیرام.

بیز آیری-آیریلیقدا او قده-ر خوشبختیک کی، بیر یئرده اولاندا بیرازدا بدبخت اولماق ایسته-ییریک.
دوکتور، منی اونوتسان، ائله اونوت کی، سندن سونرا هئچ کیمین یادینا دوشمه-ییم.