Kult.az حبیب ساسانیاناین رحمتلیک آشیق غافار ابراهیمی نین اؤلۆمۆیله باغلی یازدیغی شعری تقدیم ائدیر:

ویقارلا یاشادی وطن یوْلوندا

دیلیندن دۆشمه دی، ائلی غاففارین

قوْپوزدا یاشات دی اردمین ائلین

کؤکسۆنده ساز اوْلدو، دیلی غاففارین

آنا وطنیم ده، آشیق دده لر

ائل قایغی سین چکن بئله یۆکسه لر

وطنین اوغروندا عؤمرۆنۆ قوْیان

ابدی یاشایار، سانمایین اؤلر.

آشیق علسگرین، دده شمشیرین

حسین جاوانلارین، اوجاغین ـ پیرین

آشیق عدالتین ـ آشیق خانلارین

سایماقلا تۆکنمز مینیندن بیرین

اوْ اولو بابامیز بابک نوه سی

جنگی کوْراوْغلونون ـ نبی نین سسی

میضراب قان آغلادی، قوْپوزلار سوسدو

کسیلجک غاففارین ایستی نفسی

یاکاموز، اوستادا عزا ساخلاییر

آشیقین یاسیندا، اۆرک داغلاییر

گمی سی باتانلار سایاق دنیزده

حزین ـ حزین، اۆره یینده آغلاییر.

اردبیل: ۱۳۹۷/۱۰/۱۷