Kult.az گونئی‌لی شاعر بولود قاراچورلونون "بوز چیچه یی" آدلی شعرینی تقدیم ائدیر:

گلدی چپیش کیمی، شن، شیطان، ورهو!
نازلانا-نازلانا اوزومه باخدی
الده نئچه بوتا بوز چیچه‌یی، او
گول‌لری هوس‌له گولدانا تاخدی‌.

"بونلاری یادگار ساخلارسان مندن"-
دئیه گؤیرچینیم پیرلادی، گئتدی
غمزه‌سی اوخ کیمی ده-یدی سینه‌مدن،
اوو ایکن، اووچوسون اوولادی، گئتدی.

گولدان‌دا بوتالار قالدی بیر زامان،
گوللری قورودو، تؤکولدو بیر-بیر
منیم‌ده ایچیمی دوغرادی هیجران
بو نازین، اَدانین معناسی نه‌دیر؟

منی بیر دفعه‌لیک آتیردی اگر،
گئدنده گول نه‌یه وئردی یادگار؟
بیلمیردی، بیلمیردی، بیلمیردی مگر
گول نقدر قالار، نه‌قدر یاشار؟

اونا سؤیله‌مه‌دیم، دئمه‌دیم ندن:
دریلن چیچکدن یادگار اولماز!
یوز ده گؤزه‌تله‌سن، یوز ده سو وئرسن،
کؤکوندن آیریلان، سارالار، قالماز!

نه بیلیم، بلکه‌ده او آج مارالین،
گومانی بو گوله گلیرمیش تکجه
بیرده، یارامازا، نه یارجی-یارین
صاباحین معناسین بیله‌یدی نئجه؟

صاباحسیز کئچمیشدی عؤمرو همیشه
کدر‌لر عؤمورلوک، سئوینج‌لر بیر آن.
صاباح‌دان نه اوموب، کوسه‌جکدی نه؟
سحری سیخینتی، آخشامی حیرمان.

او سئللر اوزونده اوزن بیر کولون،
بوتاسیندا آچان گوله بنزردی.
هر آن بو دهشتلی طالعین، یولون،
داشلی دالغالاری باغرین ازردی-

او سرت قایالارین قوزو جئیرانی،
قورشون‌لو، بیچاق‌لی شهرده دوستاق
بیر قارین میننتلی چؤرک قوربانی،
هر گئجه بیر قوردون ائوینده قوناق-

اؤزو بختی قارا پری‌لر کیمی،
پئشه‌سی بخته‌ور دئولره خیدمت!
قوینو بخته‌ورلیک اوجاغی لاکین
نصیبی قارا گون، قیسمتی حسرت.

عشقه، محبته سوسوز اوره‌یی،
گاه ایکییه باغلی، گاه اوچه باغلی
اومودو، آرزیسی، عشقی، دیله‌یی
بیلمز نه‌یه باغلی، لاپ هئچه باغلی-

نئجه‌کی قلبیندن چیخاردی، آتدی
بورانلی گئجه‌ده باش آلدی گئتدی
غوبارلی کؤنولدن توفان قوپارتدی،
دومانلار ایچینده ایتدی کی ایتدی.

بیر نئجه دولاندیم دالیجا خسته،
یئره، گؤیه زنجیر سالدیم تاپمادیم؛
آختاردیم، قویمادیم داشی داش اوسته،
هر یاندان سوراغین آلدیم، تاپمادیم.

گون کئچدی، آی کئچدی، ایل‌ده دولاندی،
حسرتین کؤنولدن آتا بیلمه‌دیم.
منیم‌ده سارامی سئل‌لر آپاردی،
ندنسه الیندن توتا بیلمه‌دیم.

اؤزو ایتدی باتدی، دوماندا-چن‌ده،
گولوده قورودو، تؤکولدو، اولسون!
غمینی یادگار ساخلارام من‌ده،
غم‌کی چیچک دئییل سارالسین، سولسون!

اونوتان دئییلم دردین، نیسگیلین،
سهند طاقتی وار منده‌ده، قاللام
شیرینین اؤزو تک غمی‌ده شیرین،
گئتدیسه، مهرینی غمینه ساللام!

دونن، قار یاغیردی، باخدیم باغچا-باغ،
سون یارپاق‌لارین‌دا تؤکوب، ساچمیش‌دی؛
یالینجا بوتالار اسیردی زاغ-زاغ،
لاکین بوز چیچه‌یی، چیچک آچمیش‌دی!

ائله‌بیل بیر آن‌دا عالم ده‌ییشدی،
بولوتلار دانیشدی، سس گلدی چندن.
ایچیمه‌ سس‌لردن ولوله دوشدو؛
"بونلاری یادگار ساخلارسان من‌دن"!

بوز چیچه‌یی، منیم سئوگی چیچه‌ییم،
آلقیش بو دؤزومه، ایلقارا آلقیش!
شاختایا، بورانا کیم دؤزرمیش، کیم،
سنده گؤر نه ده-رین معنا وارایمیش!

قیزین! اوره‌ییمین اودونا قیزین!
سن منیم عشقیمین سون باهاریسان.
او گوناهسیز قیزین، پناهسیز قیزین،
بوراندا گول آچان یادگاریسان.

سنی اوره‌ییمه اکیرم باری
کؤکسومده کؤک سالیب، بوداق آتاسان
یاغدیقجا باشیما زمانه قاری،
هئی چیچک آچاسان، چیچک آچاسان!

✍بولود قاراچورلو (سهند)