کولت آذ. گونئی‌لی شاعر و ژورنالیست حبیب ساسانیانین شعرینی تقدیم ائدیر:

خان چوبانێن یانێقلێ نئیینده، نفس منم

دوستاقلانان آنا دیلیمه، وای قفس، منم!

ایللَردی تاپدانێر آنایوردوم، جفاییله

قاندال قوْلوندا، باغرێ یارێلمێش اوْ سس، منم

آرپاچایێندا دالغالاریێلا، قوجاخلاشان

ظالێم خانێن اؤنۆنده سارایلاردا سس، منم.

بابک بابام باش اَیمه دی، عؤمرۆنده دۆشمنه

ظۆلمه اَگیلمه ین، دَلی دۆمرۆل نفس، منم.

آلپ ارسلانلارین روما قارشێ، ایگیدلیگی

آل جلایرین کوْر اوْغلوسونا، نعره -سس، منم.

اسکی شَهَر یئرینده یوْنولموش، داش هئیکلین

یئددی مین ایل ایزین باغێران جانلێ سس، منم.

قارتال داشێ، قوْنوب ساوالاندان باخێر بیزه

محراب داشێندا گؤیلَره قالخان نفس، منم.

قورقود دَدَم سازێندا، ایگیدلیک تۆکَنمه ین

ستارخانێن بئرنوونا، گۆلله -سس، منم.

شاه اسمایێل خطایی بابام یوردو یاتما، دور

دریا تامارزێ قاره بالێقدا، هوس منم.

دۆزدۆر صمد قاووشدو بالێقلا، دنیزلرَه

بَز قلعه سینده، ناله چَکن قانلێ سس، منم.

ایندی قلم قێلێنج یئرینه ایشلَه ییر، (حبیب)

آزادلێغێن سفیری اوْلان، گۆجلۆ سس منم.