دوستاقدا چکدییی آجیلاردان هئچ دانیشمادی. آنجاق چوخ چالیشدی اؤزونو یاخشی آپارسین. آپاردیدا. اَن سونوندا گئجه یاریسیندا سوبانین یانینداکی اوتوراجاقدا اؤلدو. تاوانا تیکیمیش گؤزلرینی باغلادیم. دوداقلاریندان بیر اؤپوش گؤتوردوم. یئنه ده قانسیز، یئنه ده سویوق.

دان یئری سؤکولدو. قارغالار قاریلداییب، قارلی آغاجلارین اوزه رینده گزیشیردیلر. سنین سئودییین گؤرونتو ایدی. قارلی گونلرده سحر ائرکن کامئرانی گؤتوروب، کوچه باجادان رسیم چکردین! قار اولسون، قارغا اولسون، بیرده چیلپاق آغاجلار دئییردین. اؤزونده یاخشی بیلیردین بونلاری بیر یئره سیغیشدیرماق اولماز. آنجاق سیغیشیب سیغیشماماغین فرقینده دئییلدین. هر دؤنه گئدیردیک نوخود بَی پارکینا*. بورانین آغاجلاریندا نیه هله یاپراق وار؟ دئییردین. اوردا قاردا چوخ ایدی، قارغا دا، آنجاق آغاجلار سویونموردو. سویوق قیلینج کیمی کسیرسه ده بیز یئنه دؤزوردوک آمما بایرام آیی گلیب، آغاجلار یئنیدن جوجره ییب یاشیل دون گئییردیلر...
صینیفده آن گؤزل قیز اولماسایدی دا، منجه باشقا بیریسی ایدی.قارا گؤزلری ایله دانیشاردیم. آغاجلار سویونسون دئیه بیر گون ائیوانیمیزدا سویوندو. قارلار چیلپاق گؤوده سینی آغ کفه نینه بورودو. قارغالار ایسه ساچلاریندان آسلاندیلار. کامئرانی گؤتوروب بو دوروموندان رسیم چکدیم. گئجه لر یاتاقدا چیلپاق جانینی آغ اؤرتوک بوروینده او رسیمی آنیمسایاردیم.

چکدیین رسیملری آغ – قارا ائله ییردیک. داها چئوره میزده کی حیاتیدا آغ – قارا گؤروردوک. آغ، قارا، قار، قارغا. بو بویالاردان باشقا بو دونیانین آیری بویاسی وارمی؟ آغ بنیزین، قارا گؤزلرین، قارا ساچلارین. آغاجلار سویونانادک آیاق ایزلریمیزدن رسیم چکیردیک. من آددیملاییردیم سن چکیردین، من ایسه سنی چکیردیم. آیاقلاریمیز شهرین هر یئرینده ایز بوراخدی. دوشونمه دن شوتویوب، هر نه یی گئری ده قویوردوق.

ائیوانیمیز قارلی قارغالی اولاندا گلیب اونو آپاردیلار. بیر آزدان منی ده آپاردیلار. من تئز دؤندوم، آنجاق او آغاجلار کیمی گئجیکدی. سانیردیم داها بایرام اولماز. داها جوجرمزلر آغاجلار. قارلار آلتیندا بئللری بوکولر. یاز گلدی آمما بایرام اولمادی. سن گئری دؤندون آنجاق شَوه گؤزلرین سولموشدو. داها ایشیق ساچان گؤزلرین سؤنموشدو. هر گون، هر سحر ائیوانیمزداکی قارغالار سنی اؤلومه ساری چکیردیلر. اونلار بوش – بوشونا اؤزلرینی یوروردولار. بیلیردیم قار یاغینجا سن هله اؤلمزسن. سحر قار یاغدی. گئجه ده سن اؤلدون. سن دونن ایدی اؤلموشدون. سنی بو ائودن گؤتورن گوندن اؤلموشدون.

اونون لئشینین قوخوسونا قونشولار تؤکولوب گلدیلر. من ائله ائیواندا اوتوروب، قارلی، قارغالی یاپراقسیز گؤرونتویه گؤز تیکمیشدیم. آرتیق آغاجلار دا تام سویونموشدولار. اونو قبریستانا گؤتوردولر، منی ایسه دلی خانی یا. مزار داشیندا سون کز اولاراق قارغالار آغیت اوخویوب بو شهردن گئتدیلر. قارلار یاغماز اولدو. آغاجلار دیرچه لیب یام – یاشیلاشدیلار. سن ایسه میشیل – میشیل یاتمیشدین. دلی خانانین بارماقلیقلاریندان سویونموش آغاجلارین بویون - بوخونونو اوخشاییرام. اونلار هر آن سنی آنیمسادیر منه. یوخسا من دونن ایدی دَلی اولموشدوم. بو بئرده هامی بیر گئییر، بیر یئییر، بیر گزیشیر. هامینین دامارلاری عینی اینه له رین دادینی آلاراق، آغیزلاری ایسه عینی درمانین قوخوسونو قوخویور. بو یئرده، بو یورتدا اؤلوم قوخوسو باش چاتلادیر...