آنا صحیفه ادبیات |
بیر گون شیرکتین بوتون ایشچیلری سحر ایشه گلنده قاپیدا بیر یازی ایله قارشیلاشدیلار. اونون اوزرینده بو سؤزلر یازیلمیشدی:
«قونشو اوتاقدا بو شیرکتده سیزین ایرلی گئتمیینیزه مانع اولان، اوغورسوزلوقلارینیزین سببکارینین شکلی آسیلیب. بیز سیزی همین اوتاغا کئچیب، او آدامی تانیماغا دعوت ائدیریک. ایچری داخیل اولون و او آدامین اوزونه دقتله باخین.
ایشچیلر اولجه همکارلاریندان اولان بو آدامین کیم اولماسی ایله او قدر ده ماراقلانمادیلار. آنجاق سونرا اونلار گون عرضینده ایشله باغلی پروبلئمله اوزلشهن زامان سانکی ایچلرینه قورد دوشدو. گؤرهسهن، همین شخص کیمدیر؟ او نیه هم اونلارین، هم ده شیرکتین ایرلی گئتمهسینه مانع اولور؟
بونو دوشونه-دوشونه هر کس قونشو اوتاغین قاپیسینا اوز توتدو. قونشو اوتاقدا ائله بیر ایزدیهام واردی کی، حتی تهلوکهسیزلیک ایشچیلرینه ده اونو ایداره ائتمهلری تاپشیریلمیشدی. اینسانلار شکله یاخینلاشدیقجا هیجان دا آرتیردی. هر کس فیکیرلشیردی: «کیمدیر آخی او اینسان کی، منیم ایرلی گئتمییمه انگل تؤردیب؟ آخیر کی، اونو تانییاجاغام». ایشچیلر یاخینلاشیب شکله باخدیقدا سانکی دیللرینی اودوردولار. اونلار شکلین یانیندا حیرت ایچینده دونوب قالیردیلار. اونلارا ائله گلیردی کی، کیمسه قلبلرینین درین یئرینه توخونموشدور.
شکیل دئییلن شئی، اصلینده، گوزگو ایدی. هر کس اونا باخان کیمی اؤزونو گؤروردو. همچینین گوزگوده بئله بیر قئید ده وار ایدی: «سیزین اینکیشافینیزی محدودلاشدیران یالنیز بیر اینسان وار. او دا سیزسینیز».
بو، ایشچیلر اوچون چوخ عبرت آمیز اولدو. اونلار بوندان سونرا اؤز داورانیشلارینا داها دقتله یاناشماغا باشلادیلار.
سنین حیاتیندا اینقیلاب ائده بیلن یئگانه اینسان سنسهن. سنین خوشبختلیینه، سنین اوغورونا، سنین آزادلیغینا تأثیر ائده بیلن یگانه اینسان سنسهن. اؤزونه یاردیم ائده بیلهن یگانه اینسان سنسهن. سنین رهبرین، سنین همکارلارین، سنین دوستلارین، سنین ایش یئرین دییشسه ده، سنین حیاتین هئچ واخت دییشمهیهجک. سنین حیاتین سن دییشهنده، اینانجلارین دییشهنده، سنین آنلاماغین دییشهنده دییشهجک. حیاتین اوچون یگانه مسئولیت داشییان اینسان سن اؤزونسهن. سن ان بیرینجی اؤزونله علاقه قورماغی باجارمالیسان...
تاریخ
2020.07.12 / 20:38
|
مولف
آیتاج آراز
|