کولت آذ آذربایجانین گؤرکملی شاعیری حبیب ساسانیانین (بو گئجه) آدلی شعرینی تقدیم ائدیر:

منده بیر دوْلغون اۆرَک، حسرته باتمێش بوگئجه

اؤزۆ غمخانه دی، دۆنیا غمین آتمێش بوگئجه.

من پریشان اوْلاراق، صۆبحه کیمی آغلایێرام

خوْش اوْنون حالینه کی، کؤنلۆنۆ چاغلار بوگئجه.

یوخوسوزلوق بو دیدَرگین اۆرَه گیم، اویدورسا

غم چؤکَر روحوما، هرلحظه سایاقلار بوگئجه.

شعرین ایلهامێ دوْغولماق چاغێ، من چوْخ سئویرم

خوْش گۆنۆمدن یازام، آنجاق گؤزۆم آغلار بوگئجه.

چارتدا باغرێم، قوْی اؤلۆم، سندَه نهایت دینجَل

یوْخ چێخێش، یوْللارێ غم اوْردوسو باغلار بوگئجه.

یاکاموز تسلیم اوْلوب درده سێغێنمازدێ، گۆلۆم

دوْلدو قان یاشلا گؤزۆ، عالمی داغلار بوگئجه.