Kult.az– گولقدم میرزا زاده نین "عشق آجی‌سی… " آدلی حکایه‌سینی تقدیم ائدیر:

داغین اتکلرینده گؤرونه‌ن کند رناگیلین کندی ایدی. یاماج بویو سپه‌لنه‌ن ائولر یاشیل‌لیقلار ایچین‌ده گوجله گؤرونوردو. یاستی داملی بو ائولر خوشبختلیکلرله دولویدو. حاصارلاری یوخ ایدی بو ائولرین. مهریبان‌لیق ائوده‌ن-ائوه، قونشودان-قونشویا سوزولوردو. اینسانلار گوزرانینی حیواندارلیق، اکینچیلیک و مئشه‌لردن ییغدیقلاری میوه‌لری ساتماقلا چیخاریردی. سحر سفره‌سینین بالی، قایماغی، یاغی ایستی تندیر چؤریینین عطرینه قاریشیب ایشتاه آرتیریردی. ائله بو حیات طرزی‌دی رعنانین گؤزللیینی آرتیران. بئش باجینین بؤیویو ایدی. اوزون ساچلاری، قارا گؤزلری جانلار آلیردی. داغلارین هاواسی، بولاقلارین دوم‌دورو سویو سیماسینا خصوصی رنگ قاتمیشدی. گؤزل ایدی. آتاسینی ائرکن ایتیرمیشدی. آناسینا کؤمک ائتمکله برابر درسلرینی یاخشی اوخویوردو. او واختا قدر کی…

آناسی رعنایا » حاضیرلاش، خالانگیله گئدجییک»،- دئدی. سئویندی رعنا. خالاسی گیل رایون مرکزین‌ده یاشاییردی. شهرین برلی-بزکلی کوچه‌لرینی، هوندور ائولرینی گؤره‌جکدی، خالاسی اوشاقلاری ایله اونسیتده اولاجاقدی.

سحر اوباش‌دان آوتوبوسلا رایون مرکزینه گئتدیلر. خالاسیگیلده های-کوی دوشدو. سئویندی خالا اوشاقلاری. گؤروشدولر، دانیشدیلار او کی وار. آخشام اوستو محله اوشاقلاری ایله گزمه‌یه گئتملی‌دیلر. آناسی ایجازه وئرمیشدی. شهر حیاتی رعنا اوچون ماراقلی ایدی. هم ده کنده قاییتدیقدان سونرا تصوراتلارینی رفیقه‌لرینه دانیشاجاقدی.

شهر حیاتی رعنادا غیری-عادی اوقات یاراتمشدی. طبیعتین فوسونکار گؤزللییندن برق ووران کندین ساکیت حیاتین‌دان فرق‌لی اولاراق اینسان الینین یاراتدیغی اعجازکار گؤرونتو رعنانی واله ائتمیشدی. بیردن بیر جوت ماوی گؤزون داوام‌لی باخیشلارینی اوزرین‌ده حس ائتدی. یاراشیقلی، هوندوربویلو، ماوی گؤزلو اوغلان گؤزونو رعنادان آییرمیردی. بوتون ووجودو تیتره‌دی رعنانین. اوریینه غریبه، هم ده خوش حسلر آخدی. گوجو چاتمادی بو باخیشلارا مقاومت گؤسترمه‌یه. داغ هاواسینین طراوتلندیردیی یاناقلاری بیر آز دا آللاندی.

بوتون گزینتی بویونجا بو حسلر موشایعت ائتدی هر ایکی‌سینی. آخشام آناسینا یالواردی رعنا. «نه اولار، آنا، بیر گون داها اجازه وئر خالامگیلده قالیم. صاباح بیر آز دا گزک شهری». خالاقیزلاری دا رعنانین آناسینی یولا گتیرمه‌یه چالیشدیلار. اونلار اوچون ده رعنا ایله بیر گون داها بیر یئرده کئچیرمک وازکئچیلمز ایدی. آناسی راضی اولدو. قیزلار سئوینج‌دن قیشقیراراق آتیلیب-دوشدولر. آناسینا ساریلیب اؤپدو رعنا، آنا اوریین‌ده ایجازه وئردیینه سئویندی.

سحر بیر یئره توپلانیب یاخینلیقداکی پارکا گزمه‌یه چیخدیلار. رعنانین اوریی ماویگؤزلو اوغلانین یانین‌دا قالمیشدی. بودور، بیر جوت ماوی گؤز عشق ساچدی. اوریی اوچوندو رعنانی. تانیش اولدولار. میدان ایدی آدی. آخشاما قدر ال-اله گزدیلر، احد-پیمان باغلادیلار، اؤز آرالاریندا سؤز کسدیلر. سحر حربی خیدمته گئده‌جکدی میدان. بو مدت‌ده رعنا اورتا مکتبی بیتیره‌جک، میدان حربی خیدمت‌دن قاییتدیقدان سونرا ائوله‌نه‌جکدیلر. میدان حربی خیدمته، رعنا داغ کندینه قاییتدی.

بیر مدت مکتوبلاری گلدی میدانین. گؤیرچین قانادلی سئوگی مکتوبلاری. یاواش-یاواش آزالدی، آزالدی… و کسیلدی مکتوبلار. داها گؤیرچینلر قانادلاریندا سئوگی داشیمادی رعنا اوچون، طبیعت رنگینی دییشدی، چیچکلر آل-الوان آچمادی، قوشلارین جه-جهی سوسدو، گونشین شفقلری داها سئوگی چتیرینه بنزه‌مه‌دی، یاغیشلاردان تورپاق عطری گلمه‌دی… گونشین دوغوشوندا، گئجه‌نین ظلمتینده، آیین ایشیغین‌دا، اولدوزلارین ذره‌سین‌ده سوراقلادی سئودیینی. کؤنلونده مسکن سالان ایضطتیراب، حسرت ساچلارینی آغ ناخیشلارلا بزه‌دی. ایلک محبتین گؤزلنتیسی اوزون چکدی، یامان اوزون…

گون-گونه، آی-آیا جالاندی. رعنانین اؤزوندن کیچیک دؤرد باجی‌سی عائله قوردو. ائلچیلر قاپینی چالسا دا کؤنلونو هئچ کیمه وئرمه‌دی. اوتوز ایکی یاشی واردی آرتیق. پایتاخت‌دان اوزاق قوهوملاری گلمیشدی کنده دینجلمه‌یه. قوناقلارین آراسیندا گؤرکه‌می ایله دقتی جلب ائد‌ن بیر معلم ده واردی. واقیف‌دی آدی. اونیورسیتتلردن بیرینده ایشلییردی. حیات یولداشی اؤولادینی دونیایا گتیررکه‌ن وفات ائتمیش، اوشاغی خلاص ائتمک مومکون اولمامیشدی. ائولنممیشدی واقیف معلم. کؤنلو راضی اولمامیشدی. ساچلاری آغارسا دا جوان گؤرونوردو.

شهره قاییتدیقدان سونرا رعنایا ائوله‌نمک تکلیف ائتدی. آرتیق یاشا دولموش آناسینین سؤزونو یئره سالماق اقتدارین‌دا دئییلدی رعنا. "عائله قور، قیزیم، گؤزوم آرخادا قالماسین، بالا"،- دئیه‌ن آناسینین گؤزلرینده یالواریش حس ائتدی. کؤورلدی، بیر آندا یاشادیغی ایضطیرابلی ایللری خاطیرلادی. گنجلیینی یارپاق-یارپاق سارالدان، سئوگی دولو دویغولارینی حسرتین قوجاغیندا دفن ائتدیی ایللری… دریندن کؤکس اؤتوروب راضی اولدو.

ساکیت و مدنی آدام ایدی واقیف. بیر-بیرینی آنلاییر، حؤرمتله داورانیردیلار. بیر قیزلاری دوغولموش، عائله‌یه خوش اووقات بخش ائتمیشدی. آرتیق میدانی دا اونوتدورموشدی قیزجیغاز.

گئجه اینیلتی ائشیتدی رعنا. اوشاق قیزدیرمادان یانیردی. اوریی اوچوندو. سحره قدر چالیشدی، بیرتهر قیزدیرماسی دوشدو قیزین. سحر یاخینلیق‌داکی خسته خانایا معایینه‌یه آپارماغی قرارلاشدیردیلار. واقیف رعنا ایله قیزینی خسته خانایا دوشوروب ایشه گئتدی. حکیمین قبولوندا نؤوبه ایدی. نؤمره گؤتوروب گؤزله‌دیلر. قاپی‌دا حکیمین آدی، سویادی یازیلمیشدی. واقیف احمدوو. تصادفه باخ. ارینین آدی و سویادی ایله عینی ایدی. گولومسدی. «هر شئی یاخشی اولاجاق». طب باجی‌سی چاغیردی. نؤوبه چاتمیشدی. رعنا قیزینین الین‌دن توتوب حکیمین اوتاغینا داخیل اولدو. «بویورون»،- دئییب حکیم باشینی قالدیردی. رعنانین باخیشلاری بیر جوت ماوی گؤزه اسیر دوشدو… او گؤزلرده عشق ساچان باخیشلاری، گله‌جک اوچون قوردوغو اومیدلری آختاردی… حسرته بوکدویو سئوگی‌سینی، لچک-لچک سولان عشقینی سوراقلادی… پوچ ائتدیی ایللر، ایتیریلمیش گنجلیگی ایله اوز-اوزه دایانمیشدی… جواب‌سیز سواللار هارای چکیردی…

«هکیم واقیف احمدوو» یازیلمیشدی قاپیدا. قارشی‌سیندا ایسه میدان ایدی…