کولت آذ حبیب ساسانیانین شعرینی اوخوجولارینا تقدیم ائدیر:

قالمێشام اؤزۆمله سؤز آراسێندا

هئی منی دانلایان، گؤز آراسێندا

ائلیمدن یازێرام، ائلیم اینجییر!

دیلیمی کَسیرلَر، سؤز آراسێندا.

ساختا تاریخلردی یالان دان یازێر

ایگنئیله اوْتورب گوْرومو قازێر

اؤزۆ هر نه سئویر، ائله جه یازێر!

مَنیسه قالمێشام دۆز آراسێندا.

اعتراض ائدیرم، کافر ‌اوْلورام!

یامان گۆنۆ اوْلسا، بیر نَر اوْلورام

سوسوز گۆل سایاقێ، هر گۆن سوْلورام

قالمێشام اؤزۆمله، اؤز آراسێندا.

اۆزده وطنداشام، اۆزده قارداشام

مجبورام بو یولو سنینله آشام؟

سن آزاد، من ایسَه، دوستاق دا یاشام!

قالمێشام اَیریلَه، دۆز آراسێندا.

سوْرغولار بئینیمه گتیریر فیشار

ایسلام اؤلکه سیندَه، بانکێدا قومار!

یارێمێز پیاندێ، یارێمێز خومار

قالمێشام دانلاقلا، دؤز آراسێندا.

قێزێل تئشت ایچینده قان قوسور ایران

آللاه بالام دئییب یادلارا، آی جان

ایندی دییَه جَک لَر دوستلار؛ حاققێ دان!

یاکاموز قالێبدێ، کؤز آراسێندا.