دئدیم زنجیر دورار؟

دئدی بوینومدا

دئدیم اؤلوم وار؟

دئدی یولومدا

دئدیم قورخار می‌سان؟

او دئدی یوخ ـ یوخ

دئدیم موجادیله‌ نه‌دیر؟

دئدی یولومدور

دئدیم اؤتکور نه‌دیر؟

دئدی قولومدور

دئدیم ساتار می‌سان؟

دئدی یوخ ‌ـ ‌یوخ

۸۱ ـ جی ایل همدان بیلیمیوردوندا اوخویوردوم، و ان یاخین دوستوم زنگاندا اوخودوغوندان دولایی، زنگانا چوخ گئدیردیم، بیر گۆن زنگانلی یولداشلاردان بیری بیر گؤرونتولو VCD گتیرمیشدی،

‌وی‌سی‌دی‌نین باشلانیشیندا سین‌جانگ بۆلگه‌سی... نین آشیق‌لارینگ کیمی سؤزلر یازیلمیشدی.

مات قالمیشدیق نه‌دن عرب الیفباسی کیمی یازیلمیشدی؟

بیر نئچه گۆن آراشدیراندان سونرا(بو گئنیش‌لیکده سانال دۆنیاسی یایغین دییلدی)،بیلدیم چین اؤلکه‌سینده اویغور تۆرکلر یاشاییرلار و اورومچو آدی بئینیمه یازیلدی.

بیر ایل سونرا سویوق‌بولاق شهرینده اوخوماغا باشلادیم،بیر نئچه فیکیرداشلا دانیشارکن اونلارا دئدیم چین‌ده ده تۆرک یاشاییر اۆچ گۆن منه گۆلدولر،آنجاق الیمده یئتیرلی قدر بلگه یوخویدو، زنگانا زنگ ائدیب یولداشیما یالواردیم او VCD نی منه تاپسین، بیر نئچه هفته سونرا اوتوبوسلا گؤندرمیشدی.. گئدیب سئوینجله آلیب گتیریب یولداشلاری سسله‌دیم، هله ده گۆلوردولر منه... بیر نئچه ثانییه سونرا گؤزل و تایسیز بیر چای قیراغیندا، اویغور اوزانلاری ساماوارا چای غویدوم دئیه بیر ماهنی اوخویوب،آردیندان چین سین‌جانگ یازیسی گلدی و من گۆلمک یئرینه آغلاماغا باشلادیم، سئوینجیمدن آغلاییردیم و سؤزوموزون یالان اولمادیغینی ایثباتلانماسیندان.

عبدوالرحیم هئییت‌ین آدینی اؤیره‌نمک اۆچون سانیرام گؤرونتونو اون سئری استوپ ائتدیریب نهایت اوخویا بیلدیک، ائله اۆره‌یه یاتان سسی وارایدی ها ایندی ده قولاغیمدا... او گئجه صۆبحه کیمی سئوینجیمدن یاتا بیلمه‌دیم و یولداشلاریم باشلاری آشاغی حالدا، گؤردوکلری ایشدن پئشمان اولاراق اونلار دا یاتانمادیلار.

دۆنن گئجه ده ۱۵ ایل سونرا گئنه عبدوالرحیم هئییت و گئنه یوخوسوزلوق، گئجه‌نین باشا‌ـ‌باشی، دولموش گؤزلریمله اؤزـ‌اؤزومه دئییردیم کاش بو گئجه ‌ده سئوینجدن منی یوخوسوز ساخلایاردین....

دئییرلر: شهیدلره آغلامازلار، آنجاق من اونو‌ـ‌بونو بیلمه‌ییرم کؤنلوم چکدیگی قدر، خوجالی‌لا قاراباغلی شهیدلریمیزه، سولدوزلو شهیدلریمیزه و زهتابی آتامیزین تک‌لیگینه آغلادیغیمدان دا چوخ عبدوالرحیم‌ هئییتین شهادتینه آغلاییب،

اؤلوم اولسون کومونیسته اؤلوم اولسون چینه، فاشیسته دئییب، ۵۸‌ـ‌جی ایلده آمریکا بایراغینا بۆکولوب اوددا یاندیریلان آشیق سازیمیزی دۆشونوب، هئییت‌ین دوتارینی(سازینی)سسلندیرن ایگیدلری اؤز بایراقلاری آلتدا گؤرمک اومودویلا آغلار گؤزله یئنه سئوینیرم.

و یئنی‌دن کورشادلارین الی‌له هئییت‌ین اؤلکه‌سی اولان توران‌دا، فاشیست‌ سارای‌لاری‌نین ییخیلماسینا اومودلانیرام.....