آنکارادا هاوانین دومان‌لی، بئزدیریجی نویابر آخشامیی‌دی. آوروپادا ساواش روزگارلاری اسمکده، گنج جمهوریت ایسه هله ده اؤزونو محکه‌ملندیرمک، بؤیومک، اینکیشاف ائتمک موباریزه‌سی ایچری‌سینده، هدفلرینه دوغرو ایر‌لیله‌مک یولوندایدی.

مصطفی کمال آنکارادا هم محله‌دن، هم ده مکتب‌دن دوستو اولان نوری جونکئرله صحبت ائدیردی. نوری جونکئر اؤل‌نه قدر مصطفی کمالین ان یاخین دوستو اولاراق قالمیش، تقاودچو پولکوونیکلیکدن، گنراللیغا قدر هئچ بیر روتبه‌نی قبول ائتممیش، اونون یئگانه اصل دوستو و سیرداشی اولموشدو.

مصطفی کمال خسته اولدوغونو و آرتیق اؤمرونون سون گونلرینی یاشادیغینی سانکی هیسس ائدیردی. کؤهنه دوستو مصطفی کمالین دؤولت مسئله‌لری، شخصی سیخینتیلاری، خسته‌لیگی ایله بوغوشدوغونو حس ائدیر.

دوستونون فیکرینی داغیتماق، پروبلئملردن اوزاقلاش‌دیرماق و هاواسینی دییش‌دیرمک ایستییر. صحبتلری ایستانبولا و گنج‌لیک ایللرینه قدر گئدیب چیخیر. ایستانبول هسرتلرین‌دن، آرادابیر گئتدیکلری تونئل‌ده‌کی آپوستولون مکانین‌دان بحث ائدیرلر. گنج‌لیک ایللرینی، حربی مکتب‌ده‌کی و آکادئ‌مییاداکی گونلرینی خاتیرلاییب، تئز-تئز تونئله گئدیب ایچدیکلرین‌دن، حتی پوللاری اولماسا دا بورج یازدیردیقلاری گونلردن دانیشیرلار. آرادابیر ده سهنه‌یه چیخیب رومئ‌لی هاوالاری سدالاری آلتین‌دا «زئیبک» اوینادیقلاری عقللارینا گلیر، نشه‌لنیرلر. سؤز طبیعی اولاراق قادینلاردان دا دوشور. پرئزیدئنتین کئفی آچیلیب. خستلیینی ده اونوتموشا بنزییر. بیردن نوری جونکرین آغلینا پارلاق فیکیر گلیر:

- مصطفی، ایستییرسن گیزلیجه قاتارا مینیب ایستانبولا گئدک. بوغازدا گزریک، اوردان بیوغلونا، آپاستولا دیریک. هئچ کس گؤرمه‌دن ده قاییدیب گلریک.

مصطفی کمال بو ایدئیایا چوخ سئوینیر، آنجاق «نئجه ائلیک، بونو؟» سوروشور. نوری جونکئر ایسه آرتیق قرارینی وئریب، هر شئیی پلانلاشدیریب. ایستیقلال ساواشین‌دا اوردویا جسارت وئره‌ن «جونک باییری»نین آلینماسینین مئماری اولان بو قهره‌مان عسگر اوچون، البته، "ایستانبول عملیاتی" اوشاق اویونجاغی‌دیر.

ایستانبول قاتارین‌دان کوپئ آلیرلار. هئچ کسه گؤرونمه‌دن گئجه قاتارا مینیب ایستانبولا یولا دوشورلر. طبیعی کی، تانینماماق اوچون بیر آز دا «تغییری-لیباس» اولوبلار. اونلاری هئیدرپاشادا نوری جونکئرین دوستو قارشیلاییر و بوغازیچینه گئدیرلر. اوردا گزیر، یورویور، دنیزی سئیر ائدیر، بوغاز هاواسینی جیرلرینه چکیرلر. سونرا بئیوغلونا تونئله - دوز آپاستولون یئرینه گئدیرلر. ساعت ۱۷ اولوب. یاواش-یاواش هر کس گلمه‌یه باشلاییب. ایستانبول‌دا ایله‌نجه مکانلاری ایشله‌دنلر ایشلرینی یاخشی بیلیرلر. خصوصیله، یونانلار عثمانلی‌دان قالما عادت-عنعنه‌لرله خیدمت ساحه‌سینین اوستاسیدیرلار. آپاستول نوری جونکئر ایله گؤز-گؤزه گلیر. کؤهنه موشتری‌سی و دوستو آتاتورکو تانیییر و اونلارین گلیشینه چوخ سئوینیر. نوری جونکئر «قتییه‌ن بیل‌دیرمه» دئییر، - «اوولکی کیمی داوران، گلنلری ده گئری قایتارما، ساده‌جه بیزه اوفیسیانتلار خاریج هئچ کس چوخ دا قوللوق گؤسترمه‌سین، خفیفجه دملنک».

گئجه کئچیر، دم‌لنیرلر. مصطفی کمال ایسه گنج‌لیک ایللرینه دؤندویو اوچون چوخ خوشبخت‌دیر. آرادا ماراقلا نوری جونکئردن ده سوروشور:

- دئیه‌سه‌ن، بیزی هئچ کس تانیمادی!

نوری بیین ده بیرجه ناراحات‌لیغی وار، او دا مکانا گیریب - چیخان آداملاردان کیم‌سه بو حادثه‌نی گؤروب، اوردا-بوردا دانیشماسی‌دیر. آپاستول ایسه اونلاری آرخایین ائل‌ییب دئییر:

- سن ناراحات اولما، پاشام.

آرتیق سیرا رومئ‌لی خالق ماهنیلارینی دینله‌مه‌یه، چالیب-اوخوماغا، اویناماغا گلیب چاتیب. هامی ماهنی اوخویوب، اویناییر، حتی آتاتورک بئله رقص ائل‌ییب، ماهنیلاری زومزومه ائل‌مک‌ده‌دیر. مصطفی کمال بو اویونو باشا دوش‌سه ده، یئنه ده اؤزونو بیلممزلییه ووروب ایله‌نجه‌یه داوام ائلییر. کؤهنه دوستونون یاخشیلیغینین فرقین‌ده‌دیر. دوستلوق دا ائله بو دئییل‌می؟!

آرتیق گئتمک واختی‌دی. هئیدرپاشادان قاتارا مینیلملیدیرلر، اونا گؤره ائرکه‌ن قالخماق لازیم‌دیر. مصطفی کمال آیاغا قالخیر، مادام هئچ کس تانیماییب، او دا ساکیتجه قاپییا دوغرو یؤنلیر. آپاستول آرخادان سس‌لنیر:

- مصطفی، پولو اؤد‌مه‌دن هارا گئدیرسن؟

مصطفی کمال گئری چئوریلیب:

- یاز دفتره، آپاستول! - دئییر.

ایکی‌سی ده بیر قوجاقلاشیر، بیر آغلاماغا باشلاییر... بو اسنادا بوتون مئیخاناداکیلار آیاغا قالخیب آلقیشلاماغا باشلاییرلار:

- بیزیم مصطفی، سنی هئچ یئره بوراخماریق، بیزی اونوتما، تئز-تئز گل!