Kult.az مممد آرازینین "وطن دئسین "آدلی شعیرینی تقدیم ائدیر:

بو گون گرک
هر آنیمیز وطن! – دئسین!
قیلینجیمیز، قالخانیمیز
وطن! – دئسین
اؤل‌نلرین اوزینه
قالانیمیز وطن! – دئسین.
وطن! – دئسین
قلبیمیزین هر دویغوسو،
هر وورغوسو
وطن! – دئسین.
فرقی یوخ‌دور، هاردا اولاق،
زامانیمیز، مکانیمیز
وطن! – دئسین
چوخ یاتدیق، چوخ مورگولدیک،
قوجا میللت!
مورگولدیک: قوشا-قوشا
داغلاریمیز اوغورلان‌دی.
چایلاریمیز، گؤللریمیز
اوغورلان‌دی.
دوزلریمیز، چؤللریمیز
اوغورلان‌دی.
اوغورلاتدیق!
ایندی سایساق سایا سیغماز،
داها نلر، نلر اوغورلانیب.
یئر اوستون‌ده خزینه‌لر،
یئر آلتین‌دا دفینه‌لر
اوغورلانیب!
قوجا میللت، هر آندیمیز،
آمانیمیز،
اگر وارسا،
ذرره قدر ایمانیمیز،
ایمانیمیز وطن! – دئسین
هر یاخشیمیز، یامانیمیز
وطن! – دئسین
علی کسیک، دیلی کسیک
اوشاقلار وار – هله دوستاق،
کؤرپه دوستاق وطن! – دئییر.
بو نه کولک، بو نه بولود،
بو نه یاغیش، بو نه قاردی؟
دیدرگینلر اوزرین‌ده
سوسوب دوردو،
وطن! – دئدی،
مورگولوسن، قوجا میللت:
داها محکم، داها اؤتکم
گل‌سین سسین،
وطن! – دئسین
قوجا میللت، بو گون گرک
هر آنیمیز وطن! – دئسین.