کولت آذ آذربایجانین گؤرکملی شاعیری هوشنگ جعفری‌نین شعرینی اوخوجولارینا تقدیم ائدیر:

اسیرم زلزله دن قورخان اوشاقلار کیمی یم
توکولن قول بوداغی شاختالی باغلار کیمی یم

چوخ دییردیم منی یورمازلا بو یول سوز یوللار
ایندی باشماقدا قابار ویرمیش آیاقلار کیمی یم

ائله بیل ائو صاحابیم قارشیما بوش سفره سالیب
بوینو چئگنینده قالان غملی قوناقلار کیمی یم

نچه ایللردی سؤزوم کؤز قالادیر کوکسومده
ایندی وولکان توره دن سینه سی داغلار کیمی یم

اوت دوتووبدور ائله بیل دنیا یانیر من باخیرام
سویو دیبدن قورویان داشلی بولاقلار کیمی یم

من گونش وورقونویام کیمسه‌یه اوخشاتما منی
داغ دؤشونده سارالان رنگی شافاقلار کیمی یم

ایللر آیلاردی گؤزوم یولدادی یوللار اوزانیر

گوروکن داغ کیمی یاخیندان اوزاقلار کیمی یم

منه داغلار کیمی وورغونلار اوزاخدان باخالار

ساچلاریم آغارسادا یاخیندان اوشاقلار کیمی یم

گونلریم کیل که لنیب نازلی نیگارین تئلی تک
دیشی غمدن تؤکولن تاختا داراقلار کیمی یم