ایچری گیررکن، او، آغ اؤرتوکلو چارپاییسین‌دا اوزانمیشدی. آچیق پنجره‌دن ماوی سمانی سیر ائدیردی. منی نیین گؤزلدیینی بیلدییم اوچون الیمده‌کی چوبانیاستیغی دسته‌سینی ماسانین اوزرینه قویوب ساکیتجه یاخینلاشدیم. بدنیمین کئییییب گیزیلددیینی حس ائدیردیم، اما بونا محل قویمادیم.

چارپایی‌سینین یانین‌دا دیز اوسته چؤکدوم... یئنه ان لازیمسیز واختدا بئینیمده بیر ملودییا سسله‌نیردی. بونون ایکیمیزین مئلودییاسی اولدوغونو درحال آنلادیم و اوزومده آغریلی بیر تبسم یاراندی... الینی اللریمین آراسینا آلیب اوزومه سیخدیم. اعتراض ائتمه‌دی، اما قارشی‌لیق دا وئرمیردی. دوغما عطیر... دانیشمایاجاقدی، بیلیردیم. بیر نئچه دفعه دریندن نفس آلیب اؤزوم دانیشماغا باشلاماق ایستدیم، اما آخماقدان ساخلادیغیم گؤز یاشلاری هر کلمه‌می بوغازیمدا دویونلییردی. اورییمده صحبته اونون باشلاماسی، ان آزیندان گوجلو اول دئیرجه‌سینه الیمی سیخماسی اوچون یالواریردیم. بو واخت مومکونسوزلوک کلمه‌سینین اصل معناسی بیر شیلله کیمی اوزومه دییب منی آییلتدی. نهایت، اودقونوب تیترک بیر سسله پیچیلدادیم:

"سن... سن تانیدیغیم هر کسدن داها قددارمیشسان. "نه اولور اولسون، من همیشه یانیندایام" دئییب ترک ائتمیجیینه او قدر گؤزل ایناندیرمیشدین کی... چوخ تئز دؤندون سؤزوندن. چوخ تئز یورولدون... هه، بیلیرم، حیات داوام ائدیر. اما سئوینجیمی، کدریمی سنینله پایلاشمایاجاغامسا، او خوش دوغما عطرینی بیر ده دویمایاجاغامسا، بؤیرونه قیسیلیب سوسماقلا بوتون سواللاریما جواب تاپمایاجاغامسا، وارسین داوام ائتمه‌سین... سن‌سیز داوام ائتمه‌سین..." یالنیز ایندی باشیمی قالدیریب گؤزلرینه باخا بیلدیم. دونوق قهوه ایی گؤزلرینده ماوی سما او قدر گؤزل عکس اولونموشدو کی، بیردن بو گؤزل منظره‌دن سئوینیب گولومسدیینی ظن ائتدیم. بلکه ده گولومسمیشدی، اما ایندی یوخ. ایندی درین بیر یوخودایدی. آنالارا مخصوص بیر احتیاطلا آییق یاتمیشدی سانکی. بلکه ده منی گؤزلدیی اوچون...

"یئنه اللرین سویوقدو، آنا. اؤزونه دقت ائتمیرسن."- ایسرارلا اونو دانیشدیرماغا چالیشیردیم. لعنته گلمیش مومکونسوزلوک آرتیق باغریمی پارچا-پارچا ائدیردی، اما اینانماماق اوچون دیرنیر و سوسموردوم: "همیشه گؤیه بیرلیک‌ده باخاردیق. من بؤیوموش بیر اوشاق، سن من‌دن داها اوشاق، بولودلاری پلنگه، تیمساها، یا دا بیر الین‌ده تورت توتموش آیییا بنزدردیک. ایندی سن او بولودلارا یئردن یوخ، لاپ یوکسکدن باخاجاق‌سان، من ایسه بئلیمده‌کی گوناهلارین آغیرلیغی ایله هئچ واخت قالخا بیلمه‌یه‌جه‌یه‌م یانینا..." ایلیق نفسینی یئنی‌دن دویماق اوچون نلر وئرمزدیم کی. غریبه‌دیر، بس او ساغ ایکن نلر وئرمیشدیم نفسی اوچون؟ نئچه دفعه اؤپوب قوجاقلامیشدیم؟ نئچه دفعه گولوشونه سبب اولا بیلمیشدیم؟ او وار ایکن دوشونموشدوممو بیر گون اونسوز قالاجاغیمی؟ باشیم چوخ دومان‌لی‌دیر، خاطیرلامیرام. ایندی بونلارین هئچ فرقی ده یوخدور آخی. زامانی ترسینه دؤندرمک اولمور...