کولت آذ گونئی‌لی شاعیر کریم احمدیانین شعرینی اوخوجولارینا تقدیم ائدیر:

بیلمیرم سئوگیمی نئجه سؤیله یم
من سنی سئویرم اورگیم قدر
کؤنلومه دوشنده یادین هر زامان
تانری دان ایسته رم دیلگیم قدر

هجرینده آتمیشام آجی حب‌لری
قالیب بوغازیم دا بیر زَهر کیمی
ساغالماز یارام دا آیریلیغیندان
سیخیر اورییمی سؤز قهر کیمی

سن‌سیز یوخ اولموشام بوران دا قاردا
تیترین اورگیم دای قیزیشماییر
وارلیغیم تؤکولدو یئل‌لر آپاردی
خیالین دردیمی هئچ سوروشماییر

من سنی سئومیشدیم اؤزون بیلمه‌دین
سؤزومو داغ‌لاردا دومانا دئدیم
سن‌سیز سنی چکدیم کؤنول إوینه
دردیمی گیزلیجه زامانا دئدیم

اوتاندیم یارامی یارا دئمه دیم
یارامی باغلادیم یار دان خبرسیز
یارسیزام سازیم دا آغلادی «شاهید»
پوزولدو ماهنیم‌ دا تاردان خبرسیز