مشهور بیر رسام، بیر گون دونیانین ان گؤزل شکیلینی چکمه‌یه قرار وئردی. بونون اوچون دونیا دا ان گؤزل شئیین نه اولا بیلجیینه دایر معلومات ییغماق اوزره اوزون بیر سفره چیخدی.

مئشه‌لیکله گئدرکن، بئلی بوکولموش یاشلی بیر آدامین یول کنارینا اوتورغونو گؤردو. یانینا گئده‌رک اونا دونیانین ان گؤزل شئیینین نه اولدوغونو سوروشدو. قوجا هئچ تردد ائتمه‌دن:

- "ایماندیر" دئدی. سونرا، بیر قصبه‌دن کئچرکه‌ن، بیر قاپی قارشی‌سین‌دا توپلانمیش توی آداملارینا راست گل‌دی. آداملارین آراسینا کئچه‌رک گنج گلینه: — «دونیانین ان گؤزل شئیی ندیر سیزجه؟» دئیه سوال وئردی. گلین، بیین گؤزلرینین ایچینه باخاراق:

- «دونیانین ان گؤزل شئیی سئوگیدیر!» دئدی. رسام یولونا داوام ائتدی. توزلو بیر یول‌دا گئدرکن جبهه‌دن گلن یورغون

بیر عسگرلره راست گلدی. عینی سوالی اونلاردان دا سوروشدو. عسگرلر:

- «دونیادا ان گؤزل شئی باریشدیر!» دئدیلر. — «رسام اؤز-اؤزونه اگر بو دونیانین ان گؤزل شئیلری ایمان، عشق و باریشسا من بونلارین شکیلینی نئجه چکه بیلره‌م کی؟» دئیه دوشونمه‌یه باشلادی. او دوشونجیله ائوینه دؤندو. ائوینین قاپی‌سیندان ایچری گیردیین‌ده ایسه دونیانین ان گؤزل منظره‌سینین قارشی‌سیندا اولدوغونو دوشوندو. اوشاقلارین گناهسیز باخیشلارین‌دا «ایمان»، آروادینین گؤزونده «عشق»، ائوینده ایسه «باریش» حالی حکم سوروردو. بونلاردان آلدیغی ایلهاملا رسام، دونیانین ان گؤزل شئیینین شکیلینی چکمه‌یه باشلادی. شکیل بیتینجه ده تابلویا بو آدی وئردی.

- «ائویم!»