آلمان کرالی ایکینجی فردریک ۱۷۵۰-جی ایلده پوستدامدان کئچرکن اورانی چوخ بینیر و "منه بورادا بیر سارای تیکین" امرینی وئریر. ائرته‌سی گون کرالین آداملاری اورا گئدرکه‌ن، همین یئرده کهنه بیر دییرمان گؤرورلر. آداملار قاپینی دؤیورلر و یاشلی بیر دییرمانچی قاپینی آچیر:

- بویورون!

- بیزی کرال گؤندردی. بورانی گؤروب چوخ بیه‌ندی. ساتین آلاجاق، قیمتی نه قدردیر؟

- ساتمیرام کی، نه پولو؟

- آخماقسان؟ کرال ایسته‌دی دئییریک.

- منه نه؟! من ساتمادیقدان سونرا کیمسه آلا بیلمز.

آداملاری گلیب کرالا دئییرلر کی:

- ذات عالیلری، بیندیینیز یئرده‌کی دییرمانچی دلیدیر. "ساتمیرام" دئییر.

- چاغیرین گؤروم منه بو آدامی.

دییرمان‌چی گلیب کرالین قارشی‌سین‌دا دایانیر. فردریک:

- سهو باشا دوشموسونوز دئیه‌سه‌ن بی افندی، من اورانی ساتین آلماق ایستییرم. نه قدردیر قیمتی؟

- خئیر سهو بیلمیرم، آداملارین دا دونن بونو دئدیلر. ساتمیرام..!

- بی افندی، عناد ائتمیین، پولونوزو آرتیقلاماسییلا وئره‌جه‌یه‌م.

- سن بیر کرالسان و پولون چوخدور. گئت آلمانییانین هر یئرینده سارای تیکدیر. بورانی مندن اول آتام ایشلدیردی. اونا دا آتاسیندان قالیب. من ده اؤولادیما وئره‌جه‌یه‌م. ساتمیرام..!

فردریک آیاغا قالخیر:

- اونوتما کی من کرالام..!

دییرمانچی باخیر و حالینی پوزمادان:

- سن ده اونوتما کی، بئرلینده حاکملر وار..!

هئچ بیر گوج، هئچ بیر سیاست، هئچ بیر کرال بئله اولسا عدالتدن اوستون دئییلدیر. هئچ کیمسه عدالتین اوستونه چیخا بیلمز، اورادا اوتورا بیلمز".

بو گون بوتون اینکیشاف ائتمیش اؤلکه‌لر حقوق فاکولته‌لرینده بو حادثه‌نی دانیشیرلار. "برلینده حاکملر وار..!"

ایللردیر کی، پوستدامدا سانسوسی سارایی و دییرمان یان-یانادیر. کرال و دییرمان‌چی عدالتله قونشو اولدولار. سحرلر فردریک آرخا باغچایا چیخدیغی زامان دییرمانچی اونا سسلنرمیش:

- ای، فردریک، چؤرک بیشیردیم، گؤندریممی؟

بو حاق‌دا فردریک دانیشارکن دئییرمیش کی:

- عدالت هر سحر منه ایستی بیر چؤرک قوخوسویلا گلیردی...