Kult.az بولود قاراچورلو- سهندین شهریارا یازدیغی منظوم مکتوبو تقدیم ائدیر :

بیر الیمده قلم، بیر الده کاغیذ.

خیالیم بویلانیر دامدان، دیواردان.

باشیمدا یار باغین گزمک هاواسی،

قاپیلار باغلیدیر، یول تاپیم هاردان؟

* * *

حصارین دالیندا کؤنۆل وئردیگیم،

او یار، بیر باغ سالیب سویو ب‍ۆل‍ۆلدن.

هئیواسی کهربا، ناری یاقوتدان.

طاغی فیروزه‌دن، دیواری گۆلدن.

* * *

ماوی ایوانیندا ساز چالیر زؤهره،

بورجوندا یای چکیب، دایانیب کیوان.

لایقی وار گیره‌م قصرینه من‌ده،

قیللی پاپاغیملان، سینیق سازیملان؟

* * *

او، بو احتشاملان، بو طمطراقلان،

قاپی‌‌سین اۆزۆمه آچماسا نه وار؟

شاهلا رعیتین صحبتی توتماز،

من بیر اوبالییام، اودور «شهریار»!

* * *

گره‌گ روخصت آلام «حیدربابا» دان،

«یوخ» جوابی بلکه منه وئرمه‌سین.

بیرده شهریاردان فرمانیم واردیر:

«شاعر بیر- بیرینی اولورگؤرمه‌سین؟»

* * *

آخ من‌ده سهندم، باشیم اوجادیر،

ایچیمده سؤنمه‌ین عشق آتشی وار.

منده صفاسی وار گؤللۆ باهارین.

باشیمی توتسادا قارا بولوتلار.

* * *

بیر الیمده اود وار، بیر الیمده ‌سو،

بیر اۆزۆم قاراقیش، بیری باهاردی.

دوستا، ایستکلییه ایستی قوینوم وار،

دۆشمنه باخیشیم شاختادی، قاردی.

* * *

لاله‌لی، چیچکلی چمنلریمده،

گلیب یورد سالسادا چوبان- چولوقلار،

یالواررام صفامدان اۆز دؤندرمه‌سین،

شهریارا لاییق «شاه یوردو»م‌دا وار.

* * *

کؤنلۆم هاواسیلا قول- قاناد آچیر،

«قاف قالاسین» آشماق دئیه- اوجالیر.

قالخدیقجا بوی آتیر، داش دیوارلارا،

آلیجی ترلانیم یورولور قالیر!

* * *

دیوارلار، دیوارلار! پولاد اولسازدا،

آلماس موشار اوللام، کسیب بیچه‌رم،

کۆلۆنگۆن بورج آللام «فرهاد» بابامین،

«بیستون» اولسازدا، چاپیب گئچه‌رم.

* * *

دیوارلار، دیوارلار! یول وئرین گئچیم،

وولقانام، نفسیم توفان قوپارار.

«بولود»‌ام ساللانسا قاشیم - قاباغیم،

آغلارام عالمی سئللر آپارار. . .

* * *

ایچیمده بوغولور دادیم، فریادیم،

هاییما نه دیوار های وئریر، نه‌یار.

نه‌داشدان‌ سس چیخیر، نه‌ده قارداشدان.

سانکی بوشلوقلاردا ایتیر دالغالار! . .

* * *

بلکه‌ده خیالدیر منی سارسیدان،

یادا کی، سئحردیر یاردان آییران.

دئییرلر:«دلبریم بیللور قصرینده

داردادیر، آسیلیب تپه ساچیندان»

* * *

سهندی قورخوتماز نه‌سارای، نه‌سئحر.

«محبت» دئییلن بیر افسونو وار.

هم «اسم اعظم» دیر، هم «اسم شب» دیر،

باغلی قاپیلاری اۆزۆنه آچار:

* * *

آچیلین، آچیلین باغلی قاپیلار!

محبت نامینا، ایستک نامینا.

اریگین، تؤکۆلۆن دمیر قیفیلار!

کؤنۆل خاطیرینه، اۆره‌ک نامینا.

* * *

سانکی توفان قوپور، گؤی گورولداییر.

بولوتلار چاخناشیر، شیمشکلر شاخیر.

اود- آلوو اله‌نیر یئرین اۆزۆنه،

دمیر دروازه‌لر سو اولور، آخیر.

* * *

گلیر قولاغیما اینیلتی‌لری:

«بوردا بیر شئر داردا قالیب باغیریر»

دوغروداندا من بیر «مروّتسیز»‌م،

قارداشیم داردادیر، منی چاغیریر!

* * *

چکیلین- چکیلین یول وئرین گئچیم!

اۆره‌گیم آلیشیب، آلوو ساچارام،

«شهریار» بوینونا زنجیر وورالار؟!

چئینه‌رم، گمیرره‌م، دارتیب آچارام.

* * *

ایشله‌ییر قولوما دمیر پاخلالار،

زنجیر قینجیخدیریر، سانجیر اتیمی.

جان قارداش! هله‌لیک باغیشلا منی،

دئیه‌سن اونوتدوم اسارتیمی.

* * *

عزیز شهریاریم! باغیشلا منی،

اینجیمه، داریلما، فیکرین هاردادی؟

«مروّتسیز» دگیل سنین قارداشین،

آنجاق سنین کیمی، اودا داردادی.

* * *

اؤزۆن دئمه‌میسن: «بیزیم ائللرده

وکیل موکّلین خرجینی چکر؟»

آنا، عشق اوجاغی سؤنمه‌سین دئیه،

اۆره‌‌گین اریده‌ر چیراغا تؤکر!

* * *

هریانی بیلمیرم، بیزیم دیاردا،

هئچده خیال دگیل، دوستلوق، محبت.

آنجاق ایشیق ساچان ایستی گۆنش‌ده،

بعضاً بولود آلتدا گیزله‌نیر البت.

* * *

بلکه‌ده نه‌بیلیم، سلطانیم قارداش!

حقیقتده ایشین عئیبی بیزده­دیر.

همین بو ایلقارین دۆشگۆنۆیۆک بیز،

گناه یاددا دگیل اؤزۆمۆزده‌دیر!

* * *

بیر آووج کلک‌باز، قمارباز ایله‌ن،

پاک‌باز اولموشوق، پاک اودوزموشوق،

مرد ایکن، نامرده رحم ائیله‌میشیک،

ایندی نامردلره محتاج اولموشوق!

* * *

دؤلتلی­یه ساخسی لازم اولاندا،

ووروب سیندیرمیشیق اؤز کۆزه‌میزی.

چیخدیغیمیز قینی بگنمه‌میشیک،

بیز ائلی آتمیشیق، ائل آتیب بیزی.

* * *

ائلیمیزه نه گۆن آغلامیشیق بیز؟

باغین شاختا ووروب، بوستانی یانیب.

ائل بیزه نئیله‌سین، نه گۆن آغلاسین؟

آغزی اوچوخلاییب، دیلی باغلانیب.

* * *

ایندی اولان اولوب، کئچنلر کئچیب،

جالانان سو بیرده کۆزه‌یه دولماز.

دالدان آتیلان داش توپوغا ده­گر،

گؤز یاشی تؤکمکلن یارا ساغالماز.

* * *

بوگۆن من سهندم، سن شهریارسان،

گل باشین اوجالداق قوجا تبریزین.

بیر کره یادلارین داشینی آتاق،

چکک قایغی‌‌سینی اؤز ائلیمیزین.

* * *

شاعیریم! دۆنیانی نئجه گؤرۆرسن؟

دوز یئییب دوز قابین سیندیرانلار وار.

قدیر بیلن یارا جان قوربان ائیله،

قدیر بیلمه‌ینه حئیفدیر ایلقار!

* * *

اؤزگه چیراغینا یاغ اولماق بسدیر،

دوغما ائللریمیز قارانلیقدادیر.

یانیب یاندیرمایاق یادین اوجاغین،

ائویمیز سویوقدیر، قیش‌دیر، شاختادیر.

* * *

دئمیرم یانمایاق، آلوولانمایاق،

یانماسین نئیله‌سین یازیق پروانه؟

یانمایاق وفاسیز یارین اودونا،

یاناق ائلیمیزه، یاناق وطنه.

* * *

وفاسیز گۆللرین اۆستۆندن اوچاق،

قوناق صداقتلی ائل قوجاغینا.

سؤنمز عشقیمیزدن بیر پیوند سالاق،

ائلین شاختا وورموش گۆل بوداغینا.

* * *

بیر یئرده قالماقدان داریلدیق، اؤلدۆک،

دوغما یوردوموزو دولاناق، گه‌زه­ک.

ائل ایلن آغلایاق، ائل ایلن گ‍‍ۆله­ک،

اینجیمیزی وطن ساپینا دۆزه­ک.

* * *

او گؤزه‌ل شه‌هرده، عزیز دیاردا،

شاعیری جوشدوران صحنه‌لر چوخ وار.

نیسگیللری چوخدور دردلی تبریزین،

بیری، ‌سن اؤزۆنسن، عزیز شهریار!

* * *

هله‌لیک کیچیک بیرداملا اولساق‌دا،

سۆزۆلک، دۆزۆلک، داماق گؤل اولاق.

بیزده باشیمیزی قاتاق باشلارا،

قاریشاق سولارا، آخار سئل اولاق!

* * *

دره‌لردن گئچک، دنیزه چاتاق،

شیلتاق دالغالارا، دؤنک کۆکره‌یک.

ایستی گۆنش ایلن قول- بویون اولاق،

قیزیناق، ترله‌یک، بولودا دؤنک.

* * *

اوچاق او قوراخلیق، پوزغون دیارا،

سوسوزوندان دیلی چیخان داغلارا.

یئیه‌سیز، قایغی‌‌سیز، یازسیز، باهارسیز،

چیچک‌سیز، یارپاقسیز، بارسیز باغلارا.

* * *

شاختالار، توفانلار، سرین کۆلک‌لر،

اسسین اۆستۆمۆزه بوم­بوز بوزاراق.

آغلایاق، آغنایاق اوجا داغلاردان،

دانقاز قایالاری دیبدن قوپاراق.

* * *

چایلارا سد ووراق، دره‌لر دولسون،

داشقین آخان سولار هدر آخماسین.

یاشارسین قوروموش کوللارین کؤکۆ،

زمیلر سوسوزدان گؤیه باخماسین.

* * *

«سهند»‌ده گۆل آچسین «حیدربابا»‌دا،

اۆزه‌رینده چادر قورسون «شهریار».

باخاق چیچکله‌نن یوردا، شعر یازاق،

شاعرده بختیار، شعرده بختیار!

* * *

کسک دۆنیامیزدان کینه‌نین کؤکۆن،

«عشقدن یئنی بیر قورولوش قوراق».

وئره‌ک شیمشکلرله قاناد قانادا،

گئده‌ک اولدوزلارا، گۆنشه قوناق.

* * *

شاعیریم! سؤزۆمۆ قوربته سالما،

قولاق آس دۆنیادا گؤر بیرنه ‌سس­دیر.

باغریوی سیخماسین بو های- هارایلار،

قیریلان زنجیر دیر، سینان قفس‌دیر.