سنی گؤرمگی منه یاساقلامیشدیلار! منه بوندان زوْر نه اوْلا بیلر؟؟؟ اوْ دا سنین دوْغوم گوٚنونه یاخینلاشان زامان! الیمدن نه گلیر؟! الیم هر یئردن اوٚزولور.

ماهنیلار بیز دئیه بیلمه‌دیگیمیز سؤزلری سانکی یالنیز بیزیم اوٚچون اوْخویوردولار بلکه ده بیزه یوْل گؤسترمک اوٚچون یازیلمیشدیلار! ایکیمیز ده چوْخ سئودیگیمیز "احمد" منی بو چتینلیکدن قورتاردی! هه دوْغوم گوٚنو ماهنیسی مونجوق آلیب و بیر قوش توْخودوم بیر کیچیک و قوْلتوغا یئرله‌شن قوش!

یالنیز سنی قوْروماق اوٚچون یاغیشلی سحر دوْغوم گوٚنونه هله چوْخ قالارکن سیزه گلمه‌لی‌یم و سنه سوْن دفعه اوٚچون دوْغوم گوٚنون اوغورلو اوْلسون دئیه‌جگم و بیر ده بو قوشو سنه وئرمه‌لی‌یم مندن سوْنرا آچیشقانین اؤنونده اوْتورا و سنه باخیب بیرلیکده قولاق آسدیغیمیز ماهنی‌نی خاطیرلادا! سن سئون دوْنومو گئییب یوْلا دوٚشدوم اوٚرگیم اسیر قوش کیمی چیرپنیردی سنه چاتدیغمدا گؤزلرین گوٚلوردو؛ خبرسیز!

خئیراوْلا؟ سنه دوْغوم گوٚنو هَدییه‌سی گتیرمیشم؛ هله چوْخ قالیر اوْلمایا اوْ گوٚن یوخسان؟ داها گؤزلریمین سویو دایانمادی دوْغوم گوٚنو ماهنی‌سینی آچدیم و مونجوقدان توْخونان قوشو الینه وئردیم!

هه! ماهنی دا دوٚز دئییردی اوْ گوٚندن بری بیر داها سنی راحاتجاسینا گؤره بیلمه‌دیم اوْ بیزیم سوْن گؤروشوموز اوْلدو، اؤزل‌جه سنین دوْغوم گوٚنونده!