آنا صحیفه ادبیات |
Kult.az سید رضا حسینی مرندین " یوخولو شهر "آدلی حکایهسینی تقدیم ائدیر:
یوخونو گؤزلریمه سوخا بیلمه دییمدن، گئجه یاریسی باش آلدیم کوچه لره. شهرده گزرکن چکدیییم آهلار بیر نئچه سینی یوخودان ائله دی. بونلار یوخولو اولاراق مندن شیکایت ائتدیلر. بو قارانلیقدا سیگارتیم بیر اولدوز ایدی، اونودا یاغیش سؤندوردو.
- "منجه یاغیش بولودلاردان یوخ، اولدوزلاردان یاغیر". عسگرلیکده یولداشلاریمدان بیری دئمیشدی.اونا اینانمامیشدیم.
- "سولار بوخار اولوب بولودلاری یارادیرلار. اونلار ایسه چاخناشیب یاغیش یاغدیریرلار" دئمیشدیم. گؤزلریمه باخاراق، اَلیله چینیمده کی اولدوزلارا ووروب اوزاقلاشمیشدی.
بیر دؤنه گلن – گئدن چکدییمده، ندنسه اوووجومون ایچی قانامیشدی. قانلی اَلیمی برک سیخیب آچدیغیمدا قان اوز – گؤزومو بویاییب یوخدان قالخمیشدیم. گلن – گئدن سسی ایله هر گئجه یوخدان دیسکینیردیم.
آنام دئییردی: -"یوخودا قان اولورسا، یوخو باطیل اولور".
او گونلردن بری بیر گون بئله اولسون دوغرو – دوزگون یاتا بیلمه دیم. یوخونو گؤزلریمه سوخا بیلمه دییمدن گئجه یاریسی باش آلیردیم کوچه لره.
ائوه دؤندویومده عسگرلر اؤنومده سیرالانمیشدی. توفنگلرینی منه ساری توتوب،بارماقلاری ایسه تتیکده ایدی...
تاریخ
2020.06.26 / 15:45
|
مولف
آینورا مممدووا
|