Kult.az نادیر ایلاهینین شئیرینی تقدیم ائدیر:

دونن گلدی چاتدی،تزه بیر یازین

عطریندن، ایییندن ، دولو سئوگیلیم
یازمیشدین چوخداندی گلمیر کاغاذین
یامان گؤزله ییرم یولو سئوگیلیم

یازمیشدین تای توشدا ،کیم گئتدییین دن
کیمین گئتدییین دن ، سن دؤنه دؤنه
بیرده بیر ائلچینی رد ائتدییین دن
اوتانا اوتانا یازمیشدین یئنه

یازمیشدین بس هیجران هاچانا کیمی
یازمیشدین،لاپ ایتیب دای خئیریم،شریم
من سنه نه یازیم ،تر نانا کیمی
آخی افیل ،افیل اسیر اللریم

آه او باغ،او بولاق،او یاز آخشامی
داشلانیر گؤزومدن ، خاطیره لرین
او گون عشقیمیزدن یانیردی هامی
بوگون نه سه ریندی هاوا نه سه رین

خزل تک کؤلگه یه وئردیم بیر به بیر
الیمی یاندیران مکتوبلارینی
قازدیم اوره ییمده ،قازدیم بیر قبیر
قویلادیم عشقیمین اعتبارینی

گئت منی گؤزله مه،گئت گؤزل پری
قاپیدان قایتارما ائلچی لری سن
آلنیمی ایسلادیب ، خجالت تری
گئت غوربت شهردن ائولنمیشم من