Kult.az گونئی‌لی شاعر رحمت یاشار شحیرینی تقدیم ائدیر:
سلام دئموکراسی
نئجه سن قاداسی ؟
ائله داریخمیشام سندن کی اورگیم پارتلیر
اوشاغلیق دا آنامین ناغیللارین دان داریخان کیمی
سن کونلومه دوشورسن ،ائله بیل بویلویام
من آزادلیق یئریکلیرم
گوره سن ایسم لر باغچاسیندا بیر قوروموش رئالیسم قالیب دیر اورگیمه باسام؟؟؟
ایده آلیسم قوخولو بیر رئالیسم؟؟

سنی کیتابلاریمدا بئله تانیش یازیب لار کی ائله بیل گونده بیزده سن
ائله یاخین یازیبلار کی بویون باغیم دان آسلانمیشسان
دوداقلاریمدان سوزولورسن هر گون
آما ائله بیل.....

ائویمیز هئچ،بویون باغیم هئچ ، دوداقلاریمدا هئچ
سنی قونشو باخچاسیندادا گورمه میشم سید کریم جددی
سن نه تاپیلمازسان!!
نه گورونمز!!
اولار بیلم قیمتین نئچه دیر دئموکراسی؟
حتما باهالی سان داااااا
آنام دئیه ردی آزادلیغین باهاسی قان دیر.
سنین ده دیرین قان دیر؟
سنده قان ایچرسن یوخسا؟!

هله بوراخ بو گیلئیلیک لری
اوزون نئجه سن؟
اوغلوم آرازا تاپشیرمیشام منی آراز قیراغیندا قویلاسین اولنده
باهاری اکینچی لر گوزله ین کیمی ،سنی گوزله ییم هر صاباح
سنده گله جکسن
آیاغلارین مزاریما باسیب منده جان دئیم جاناسی

سنین چگیردگینی اورگیمده اکمیشم قاراجیغیم دئموکراسی
داها سولطان لارین جیققاسیندا
شاهلارین تاجیندا
مفتی لرین ساققالیندا سنی گزمه یه جه یم بیرده
باتوم سیزیلتی سیندان شالواریمی باغلایا بیلمیرم والله
گوزوم ده قالین شوشه لی گوزلوکله دوست اولوبدور تزه لیکده
هردن ده سفه لیرم
هردن ده فیلسوف اولورام
هردن ده عاشیق
هردن ده لاپ سارساخلیرام بوجور
ائله بودااااا
بودور منیم چکدیگیم گونلر سن سیزلیکده ،آزادسیزلیق دا
بو مدرنیته ده
آغزیمیزدا چرچی ساققیزی کیمی گلوبالیزیشن چئینه یر کن

سن ده "مصادره "اولدون کاپیتالیزم ایچین
کمونیزم ایچین
فاشیسم ایچین
بیزده کی هئچ ،سنی تانیمیریق
داریخیرام سندن
موز دادی وئرن پپسی کیمی
آزادلیق قوخوسو وئرن دئموکراسی
سنی یئریکله ییرم
اوی سنی
سنی آزادلیق...