Kult.az آذربایجان شاعری خلیل رضا اولوتورکون شعرینی تقدیم ائدیر:

کاینات گونشله، یئر اوزو یازلا،
اوره ییم سنینله دولودور ،گولوم!
آخمیسان عؤمرومه گولوشله، نازلا
گل اوچاق شریکلی قانادیمیزلا.
ان بؤیوک سئوینج له سئوینیم گولوم!
اوره ییم سنینله دولودور گولوم!

دنیزدن چیخیرسان، آیاغین قوملو
یاش بدن یاپیشیب یاش پالتارینا.
ایذین وئر گؤیلردن ائنسین ملکلر،
گلیب سو تؤکسونلر آیاقلارینا.

"کپز"ین، "قوشقار"ین دریم گولونو،
سپیم یوللارینا، قدم لرینه.
گنجه نین، دربندین ایشیق لارینی
قوی دوزوم بوینونا زومرود یئرینه

سن بیر اولو داغسان، من داغ بولاغی،
باغریندان سوزولوب دورولموشام من.
اؤپوب اوخشادیغین کؤرپه لرینه،
آنا مئهرینه ده وورولموشام من.

"لئیلی"م، "بئاتریچه"م، "زؤهره"م، "جولیئتتا"م!
بوتون داستانلارا ایلکین یاراشیق!
بیز ایکی ائرادا، آلتی قیته ده،
اؤلومسوز عشق اوچون آداقلانمیشیق...