Kult.az شاهناز کمالین گونئی آذربایجانا حصر اولونان "ساوالان" آدلی حکایه‌سینی تقدیم ائدیر:

یوخودان هؤولناک آییلدیم. قان-تره باتمیشدیم. دیلیم شیشمیش‌دی ائله بیل. قالخیب یئریم‌ده اوتورماق ایسته‌سه‌م ده، سویوق منه گوج ، یورغانی‌می تزه‌دن باشیما چکدیم. گؤردویوم رؤیانی یئنی‌دن خاتیرلاماغا چالیشدیم.

آنامی گؤرموشدوم یوخوم‌دا. ایللردیر نفسینه حسرت قالدیغیم آنامی. یوخوم‌دا باشی‌می اونون ضعیف دیزلرینه قویوب اوزانمیشدیم. سومویو بوینومو اینجیت‌سه ده ناراحات اولموردوم. ایچی‌می راهاتلادیردی بو آغری. آنام تیت‌رک بارماقلارینی قیوریم ساچلاریمین آراسین‌دا گزدیریر، پیچیلتی ایله دانیشیردی:

– گؤزلرینه قوربان اولوم، اوغول، گؤر گله بیلیرسن ائویمیزه؟ بیلیرم، چتین‌دیر. آتان دا، قارداشلارین دا دئییر بو طرفلره کئچسه‌ن، آغزیما داش-تورپاق، او دفکیلر کیمی سنی توتارلار… اوز سؤز وئریب، دئییر، بیر آز پول ییغیب منی آپاراجاق سنی گؤرمه‌یه. آنان سنه قوربان، سحر ده آداخلانیب. قیزین کؤن‌لو یوخویموش، زورلا وئریبلر… داریخما، بالام، ائله هامی بیلیردی کی، اونو سنه وئرمه‌یه‌جکلر. سن ائله تهران‌دا زیندانا دوشن‌دن علی کیشی دئمیشدی کی، قیزیم او گده‌نین آدینی توتسا، باشینی کسه‌جه‌یه‌م. فیکیر ائلمه، باشینا دؤنوم، قیز قحتلیگی دئییل کی. سن اؤزونه بیر یووا قور، ائو ائشیین اولسون، قالانی دوزه‌لر.

یوخونون بو یئرین‌ده چؤل‌ده های-هشیر قوپدو، دئیه‌سه‌ن، آتام ناخیری گتیرمیش‌دی. سسی حیطی باشینا گؤتورموش‌دو. سؤیوشلر یاغدیریردی کیمه‌سه. آنام باشی‌می اهمالجا دؤشیین اوستونه قویوب دوردو:

گئدیم گؤروم یئنه هان‌سی ایتین باشی قالیب آغزین‌دا.

آتام همیشکی کیمی حیطیمیزده‌کی بوش وئدره‌یه بیر تپیک ایلیشدیردی، وئدره قاپیمیزا دی‌دی… یوخوم یاری‌دا قیریل‌دی.
اوتاغیم سویوق ایدی. دوروب ال-اوزومو یوماغا ارینیردیم. گؤزلری‌می یومدوم. نئجه یوخویا گئتدیی‌می اؤزوم ده بیلمدیم.
آنام ایدی. آنامین سسی ایدی:

– گل، باشینا دولانیم، گل. گئدن‌ده سویوندوغون کؤینک‌دن ایگین ده چکیلیب. گؤر هاواخت‌دیر گئدیب‌سه‌ن، جان بالا!

دیکسینیب آییلدیم، یوخوم یئنه یاریمچیق قال‌دی. یئنه آناما دئمک ایستدیکلری‌می دئیه بیلممیشدیم.

یئریم‌دن قالخیب واننا اوتاغینا کئچدیم. ال-اوزومو یویوب بیر آز اؤزومه گلمک ایستییردیم. دیلیم-آغزیم قوروموش‌دو. ائله بیل، آناما دئمک ایستدییم سؤزلر دیلیمین اوستونه قالاقلانمیش‌دی.

آناما دئیه بیلمدیم، دئیه بیلمدیم کی، سن‌دن اؤترو بورنومون اوجو گؤینییر، بیر دری، بیر سوموک اولان ووجودونو قوللاریمین آراسینا آلیب وار گوجومله اؤزومه سیخماق ایستییرم، قیزی‌لی-آغ ساچلارین‌دان اؤپمک ایستییرم. باشینی سینه‌مه سیخیب آغلاماق ایستییرم. یوخوم‌دا هئچ نه دئیه بیلممیشدیم آناما. دیلیم توتولموشدو.

آج قالدیغی‌می، گونو یایما، یا دا کارتوف سویوتماسی ایله اؤتوشدوردویومو دئیه بیلممیشدیم. قالدیغیم ائوده‌ن شیکایت ده ائده بیلممیشدیم. اوسته‌لیک تهرانین «اوین» زیندانینین ۲۰۹-جو بندین‌ده «قازاندیغیم» جان آغریلاریم بترلشمیشدی بو آخیر واختلار . بونلارین هئچ بیرینی دئممیشدیم آناما. هئچ دئمک ده ایسته‌میردیم. آرواد آیری جور دوشونوردو. ائله بیلیردی، بورادا منیم یاخشی شرایطیم، ایستی منزیلیم، یئمه‌یه گونده‌لیک چؤرییم وار.

ایران‌دان قاچان‌دا آنام باکییا گئتمیی‌می ایستمیشدی. «هر نئجه اولسا، دوغما قارداشیق اونلارلا» دئمیشدی. آرواد اینانیردی. آذربایجانا دا اینانیردی، تورکییه‌یه ده.

گونئی آذربایجان‌دا دوغولموشام، ساراجلی کندین‌ده. خودآفرین کؤرپوسون‌دن ۴ کیلومتر غرب‌ده. خریطه‌یه باخمایین عبث یئره. ایندی او کند یوخ‌دور. ساراجلیلاری سوجیلی، ماهروزلو، جفرآباد جاماعاتی ایله بیرلیکده «خودآفرین» شهرجیینه کؤچوروب، یئرینده بند سالیبلار.
اوشاقلیغیم، آراز قیراغین‌داکی کندیمیز، ائویمیز، آرازین او تایین‌دا گئجه ایشیقلاری سایریشان کندلر…

آرازین بو تایین‌دا بیز ایدیک، او تایین‌دا زنگیلان رایونو. دئییردیلر، اوردا قوهوملاریمیز یاشاییر، یاش‌لیلار، حتی ائولرینی ده تانیییردیلار، آنجاق گئدیش-گلیش یوخ ایدی. او قوهوملاری جمعی بیر دفعه گؤردوم. او بؤیوک فاجعه زامانی. بو باره‌ده بیر آز سونرا دانیشاجاغام. هله سیزه کندیمیزدن، ناغیلا دؤنه‌ن اوشاقلیغیم‌دان دانیشیم.
داوامی وار