Kult.az ابولقاسیم نباتینین "گل‌سین گلمه‌سین"آدلی غزلینی تقدیم ائدیر:

صبا، من‌دن سؤیله او گلزارا،
بولبول گلستانه گل‌سین، گلمه‌سین؟
بو هیجران دوشگونو، ایللر خسته‌سی
قاپینا درمانه گل‌سین، گلمه‌سین؟

من قوربانی اولوم عنبر تئللرین،
غنچه دوداقلارین، پوسته دیللرین،
او لاله روخسارین، میشکین خاللارین
اودونا پروانه گل‌سین، گلمه‌سین؟

گؤزوم چوخ حسرت‌دیر خومار گؤزونه،
گونش جمالینا، شکر سؤزونه،
اوتانیرام، نئجه دئییم اوزونه،
دردین خسته جانه گلسین، گلمه‌سین؟

دولاشدیر بوینوما شومشاد قولونو،
قوجاقلاییب قوجوم اینجه بئلینی،
لعلی-لبین امیم، سوروم دیلینی،
ایستر اؤلو جانه گلسین، گلمه‌سین؟

نباتی ایستمز سن‌سیز دونیانی،
عزتی، حؤرمتی، شؤوکتی، شانی،
بیر زادا قالماییب داها گومانی،
بو باش او میدانه گلسین، گلمه‌سین؟