کولت. آذ غلامرضا صبری تبریزینین "آتاسی زیندان‌دا اولان تبریزلی اوشاق" آدلی شعیرینی تقدیم ائدیر:

آتامین حیاتی زیندان‌دا کئچیب

خاطیرلاییرام اونو توتان پلیسلر،

گلردیلر گئجه‌لر قاران‌لیق‌دا

کوچه‌ده آدام اولمایان‌دا.

قاپینین سسین‌دن بیلردی آنام

آغاراردی رنگی بیاز قار کیمی.

بیلیردیک آنامین حالین‌دان

گلیبلر، یئنه آپارسینلار آتامی

زین‌دانا، ایشگه‌نجه‌یه، اؤلومه.

بیلمیردیم ندیر زین‌دان،

ندن آپاریرلار آتامی…

اما خاطیرلاییرام آتام

گئدردی اؤز آیاغییلا، ساپساغلام،

قاییدان‌دا ایکی آی سونرا

قول-قیچی سیندیریلمیش گلردی.

آنام ملهم سالاردی

آتامین آیاقلارینا، کورکلرینه.

ائشیدیردیم آتامین ناله‌سینی درد ایچین‌ده

کئچمه‌دی چوخ زامان،

اؤیرندیم آتامین هر ایل

حبسه آتیلماسینین سببینی.

آتام ایستییرمیش مکتب آچسین

آنا دیلین‌ده

بو ظالم دؤولت

بونا گؤره آتامی چکیرمیش

محکمه‌یه، ایشگه‌نجه‌یه

تا سوسدورسونلار دیلینی تبریزده.