کولت.آذ داهی آذربایجان شاعری محمد فضولینین "لیلی و مجنون " اثرین‌دن لیلینین مناجاتینی تقدیم ائدیر:

چوخ آغلادی، ائتدی ناله و زار
درد دل زارین ائتدی تکرار

گوردو مددینه صبح یئتمز
شب درد دلینه چاره ائتمز

اوز توتدو اونا کی فیض عامی
چکمیش بو مدارا صبح و شامی

راز دل زارین ائتدی آغاز
ک_ای واقف حال و عارف راز!

یوخدور غم و دردیمه نهایت
غمدن کیمه ائیله ییم شکایت؟

غم بی حد و من بسی ضعیفم
من بویله غمه هاچان حریفم؟

یا وئر منه محنتینده طاقت
یا طاقتیم اولدوقونجا محنت

گر جامه ی صبریم ائیله سم چاک
حکمون یولو گورونور خطرناک

ور کونلومه وئرسم استمالت
طاقت جه دئییل غم و ملالت

ناموس دان ائیله سم جدالیق
مجنون ایله قیلسام آشنالیق

قورخوم بو کی عصمت اولا پامال
فرمانه موافق اولمایا حال

قیلسام بو هواده حفظ ناموس
معموره ی وصلیم اولا محروس

قورخوم بو کی دود آه مجنون
احوالیمی ائیله یه دگرگون

صادقلرین آهی معتبر دیر
اوندان حذر ائیله مک خطر دیر

اول اویله، بو بویله، نئیله ییم؟ وای
بیلمم من عاجزه نه دیر رای

یارب! متحیرم من زار
محنتلره اولموشام گرفتار

سرمنزل امنه راه بیلمم
سندن اوزگه پناه بیلمم

گور باده ی غفلت ایله مدهوش
قیل پرده ی لطفونو خطا پوش!

دئرلر کی ستم رسیده مجنون
اولموش من مبتلایه مفتون

من بی سر و پا اونا نه لاییق؟
کیم حوسنومه اولا کیمسه عاشق،

من ذره ی خوار و خاکسارم
گرد ره خاک رهگذارم

روحوم کی بدن ده دیر، سنین دیر
هر نئچه کی منده دیر، سنین دیر

گنجینه ی حوسنونه امینم
سن سن سببیم کی نازنینم

یا رب! مدد ائت کی بو امانت
محفوظ اولا تا دم قیامت

تا قربه توجه ائتدیگیم چاغ
آلنیم آچیق اولا و اوزوم آغ...