-داشلاردان ایکیسینی اووجومدا توتوب دئدیم:
تکسن جوت؟

دئدی: تک.

اویونو باشلادیم. داشلارین بئشین ده اووجلایب سپدیم یئره. یاخشی سپیلمیشدی، آرالیدیلار. داشلاردان بیرینی گؤتوردوم اویغون فاصیله یله آتدیم گؤیه، او آشاغا گلینجه داشلارین بیرینی یئردن گؤتوروب اونو توتدوم. بو یولویلا دورد داشیدا یئردن گؤتورماغی باجاردیم. بیرلری اوغورلا باشا وئردیم. ایکی لرده، داشلاری الیمله ائله سپملیدیم کی ، جوت جوت دوشسونلر. بو دفعه بیر داشی گؤیه آتاندا یئرده کی داشلاری جوت جوت قاپمالیدیم. ایکیلریده بیر تورلو باشا وئردیم. دوستوم سارای هیجانلا منیم اللریمه باخیردی. منده مغرورجا، اوچلره گئچدیم.

اوچلرده داشلاری بارمارقلاریمین آراسیندان ائله یئره سالمالیدیم کی، داشلاردان اوچو، یان با یان و ایکیسیده بیر طرفده بیر بیرینه یاپیشمادان دورسونلار. بو کز شانس گتیرمدیم داشلار چوخ پیس دوشموشدولر. و یاندیم.
سارای سئوینرک اویونا باشلادی. بیرلری چوخ مهارتله باشا وئردی. ایکیلر، اوچلر و گئچدی توخماغا. اورگیم قوش پیشیریردی. وای دده! دئیه سن او اوداجاق. توخماق چتیندی اورگیمده دئدیم اینشالاه یانار. آنجاق او یوموشاقجا، الینده اولان بئش داشدان بیرینی آتدی گؤیه، دوردونو بیر یئرده یغجام قویدو یئره،سونرا یئنیدن اونلاری قاپدی. قجله گؤزلریله ائله منه باخدی کی قیزدان زهلم گئتدی. باشلادیم اوجادان دئمگه:

آغ مالا، گؤی مالا،بو قیزین گؤزون تئز باغلا...

من حیرصله بونلاری اوخویا اوخویا سارای سایمادان، توخماق تکلری و توخماق جوتلرینی ده اوینادی، گئچدی ایلانا.

سول الینین ایشاره بارماغینی میندیردی اورتا بارماغین اوستونه، باش بارماقلا اونو بیر کؤرپو دوزلدیب قویدو یئره.
یئریمده هئی وورنوخیردیم و نیاران گؤزلرله او کؤرپویه باخیردیم. ساغ الیله داشلاری گؤتوردو کؤرپونون اوستوندن یاواش سپلدی یئره و داشلاری بیرجه- بیرجه او کؤرپودن گئچیرتدی.

او گون اویونو او اوتدو. منیم قولاغیمدان یاپیشیب فخرله دئدی: قوش گؤرست. او گون منیم قارا باختیمدان هئچ بیر قوش گؤیده اوچمادی! منیم قولاغیم دا دوستومون الینده قالدی.

ایللر اوستوندن گئچدی. ایندی نهایت بئش داش بیر قوش اولوب گؤیلرده اوچماغا باشلایب. بو قوش اوشاقلارا سئوینج و صولح ارمغان ائدیر. اویونلاردا اودان و اودوزاندا بو قوشلا اوجالارا یوکسلیب و ادبیات دونیامیزی ایشیقلاندیرماغا باشلاییب. یولو دواملی اوغورلاری بول اولسون.