کولت. آذ گونئی آذربایجان‌لی شاعر سهراب طاهیراین شعرینی تقدیم ائدیر:

دردی درد اولموشدو ائلیمده منه
آغلادیم بیر ناشی گولنده منه
هئچ کس آغلاماسین اؤلنده منه
من هئچ واخت هیچ زامان اؤلمه رم داها

آزاد قارداشیم وار اونونلا خوشام
من گرک ساحیلی ساحیله قوشام
ایکی بؤلونمکدن ائله قورخموشام
چؤپوده ایکییه بؤلمرم داها

دریالار دنیزلر منه دایازدیر
ان درین بیر چای وار اودا آرازدیر
منه گؤروش وئرین آزادلیق آزدیر
گؤروشسم آیریلیق بیلمه رم داها

عؤمرومدن غوربتلر، يادلار، قووولسون
کئچميشيم، يیيه‌سيز قالدی، قوی اولسون
آنجاق گله‌جه‌ييم،️ منیمکی اولسون
من اونو عؤمرومدن سيلمه‌رم داها

منیم سعادتیم هارداسا ایتدی
او آسان گلمیشدی آسان دا گئتدی
منه نه ائتدیسه سعادت ائتدی
بدبخت سعادته گولمه رم داها

قورخاقلار اؤنومده چؤکوب اییلسین
وطنسیز وقاریم گؤیه دیکلسین ؛
دئیین آزادلیغا اردیمجا گلسین،
من اونون آردیجا گلمه رم داها .