آنا صحیفه ادبیات |
کولت. آذ گونئی آذربایجانلی شاعر سعید موغانلینین شعرینی تقدیم ائدیر:
بیزدن بیر آتلی گئتدی
اللریمیز ساچلاریمیزی یولوردو،
و قادینلیغیمیز اوخشاما ملهییردی کپنک گیلین قانادلارینا.
گلدی ده گئتدی،
قاراداغلاریمیزین قارالیقلارینا دوغرو،
گؤزلری خان قیزی،
اللری، فهله بایراغینین قابار گونشی!
آتین اویناندی گئتدی،
اوغلومون دوداقلاریندا چیپچالانمادان!
اوغلونون قولاقلارینا شعریمی پیچیلدامادان!
هئیییی دوزون دئ قاداسی
اؤلنده اؤله بیلدینمی بیزسیز؟
اؤلدونمو یولداش!
بیزی هانسی کاپیتالا تاپشیردین؟
کاپیتالیزمین پنجهلری سیخیر اورهییمی!
هانسی سئرچهنین قانادلاریما سیغینسین ایشچی بابام؟
دئمهدین آنام هانسی بایاتینی اوخشامایا کؤکلهسین،
نئجه بستهلنسین بالابان آغلاییشی،
باجیلارین قارداش وای سسینه؟
هانسی میداندا توپلاشسینلار وطنینی سئون سئوگیلیلر؟
دئدیم کی سئویرم سنی!
قوزو سسیمی دویمادینمی؟
قونشو سللولدان ائحمالجا دئدیم؛ سئویرم سنی آزادلیق خانیییم!
تبریزین دار کوچهلری ده سئویردی سنی!
اینان، تبریزه یاغیش یاغیردی، سن جان وئردییین غوربتده.
آنالار اوزانمیشدیلار اورژانس یاتاقلاریندا،
و سئوگیلی قیزلار قان گؤروموش کیمی سوسموشدولار،
دئپرسلیک احتمالی وار بو سنسیزلییین.
اؤلدونمو، آراز قییلارینین قان قارداشی؟
اؤلدونسه راحات اوی،
بیزیم نوبه هله چاتماییب حؤرمتلی تاواریش بَی...
تاریخ
2020.05.29 / 14:05
|
مولف
آیتاج آراز
|