آنا صحیفه ادبیات |
کولت. آذ اومید نججارینین ۲۱ آذر حرکاتینین خاطرهسینه حصر ائتدیی "فالچی" حکایهسینی تقدیم ائدیر:
قارا فالچییا اینانیردیم. بارهمده دئدیی هر سؤز حقیقت ایدی. او، یالان دئمیردی. ساعت ۲۱:۰۰-دا "پیشوری" پارکیندا حیات سون سؤزونو منه دئیهجکدی. سونون نفسینی حس ائدیردیم.
یولومو گؤزلهیهجک کیمسه یوخ ایدی. کاش کی، سئودییم بیر قیز اولایدی، هئچ اولمازسا اونونلا ویداعلاشاردیم. اولسا ایدی، زنگ ائدیب "باغیشلا منی، باغیشلا کی، عمور آمان وئرمهدی، یئنیدن اللرینی توتام. سنینله بیر یووا قورا بیلمدیم، سئوگیلیم! منی سئودیینه گؤره تشکر ائدیرهم" دئیجکدیم، سؤزلریمین سونوندا من آغلایاجاقدیم، ساری ساچلی قیز دا تلفن خطینین او بیری طرفینده، منه قوشولوب هؤنکور-هؤنکور آغلایاجاقدی. سئودییم قیز "ایمکان وارسا گئتمه، سئوگیلیم، اوزاقلاشما... سنسیز یاشایا بیلمرهم" - دئیهجکدی. من ایسه محاربهیه گئدیب شهید اولاجاغینی بیلهن عسگر کیمی "سنی مزاریم اوسته گؤزلهیهجهم، تئز-تئز گل گؤروشومه" - دئییب سونرا تلفنو سؤندورهجک، گؤزلریمین یاشینی کؤینییمین قولو ایله سیلجکدیم...
قیسا حیاتیمدا اؤز وارلیغیمی اونودوب، یاشاماماغی ترجیح ائتدییم گونلریم چوخ اولوب. یاخشی کی، صاباح او کوکنارین آلتینداکی اوتوراجاقدا بو حیاتلا بیردفعهلیک ویداعلاشاجام. کیم بیلیر، اونون اوستونده نئچه-نئچه سئوگیلیلر اوتوروب، قارانلیقدا عشقدن-محبتدن، گلهجک اومیدلری حاقیندا دانیشیبلار، گیزلین-گیزلین اؤپوشوبلر. اوتوراجاقدان منه دوشن پای ایسه یالنیز اؤلوم اولاجاق.
بلکه، او اوتوراجاقدا راحت-راحت دونیادان کؤچهجهیهم. بلکه ده، چتین اولاجاق. هانسی شکیلده اؤلجهم؟ بلکه بوغولاجام، سون نفسیمی نفسسیزلییمین سوکوتوندا وئرهجهم؟ بلکه یاناجام؟ قوورولا-قوورولا، عذاب و اضطراب چکه-چکه، آلیشیب یاناجام، کوله دؤنهجهم؟ اینسان اؤلمک ایستمیر. لاکین اؤلومون هنیرتیسینی حس ائدنده، بیلهنده کی، اؤلوم بورنونون دیبیندهدیر، او زامان سون نفسینی وئرمیین ان راحت شکلینی آرزولاییر اؤزونه.. اما حیاتین اؤز پلانلاری وار. کایناتین محتشم نیظامیندا اینسان اؤزباشینا حرکت ائده بیلمز. حیات اینجیتمهدن ال چکهسی دئییل، نیظامی پوزانین جزاسی کسیلمهلیدیر.
...قیسمت!.. آلین یازیسی!.. هه، منیم قیسمتیم محض او کوکنارین آلتینداکی اوتوراجاغین اوستوندهدیر.
"قیسمت" سؤزونون ایچیمده حضور یارادان گوجونه حیران قالدیم. جانیما، قانیما سانجی کیمی، آغری کیمی هوپان قورخونون گئتدیکجه آزالدیغینی حس ائدیردیم. اؤلومه اوزو آغ و آلنی آچیق گئدهجهم! چونکی قیسمت بئله ایمیش! هر گون یئمک بیشیرمکدن، پالتار یوماقدان، چیممکدن، حتی یان قونشونون دیغ-دیغ آروادینین سسیندن و اوشاقلارینا چیغیریشیندان یاخام قورتاراجاق. بیر داها دایانمادان تکرارلانان حیات حادثهلری ایله اوزلشمهیهجهم. اصلینده اینسانی اؤلدورهن تکرارلاردیر، بونون آدینی بیز اجل قویموشوق. تکرار سؤزونون درینلیینده آجی بیر حس ابدی یوخویا گئدیب. هر سحر یوخودان اویانیب عینی گونشی گؤرمک کیمی بیر حس...
تاریخ
2019.08.28 / 09:58
|
مولف
آینورا مممدووا
|