Axar.az
یوخاری
16 سئنتیابر 2019


۲۱ آذر حرکاتی خاطره‌سینه...-فال‌چی-حکایه-ایکینجی حیصه

آنا صحیفه ادبیات
12 Punto 14 Punto 16 Punto 18 Punto

اولی بورادا

گؤره‌سن من نیه گنج اؤلجه‌م؟ آخی اؤزومو ساغلام هیسس ائدیره‌م، آلتی آی بون‌دان اول قان تحلیلی ده وئرمیشه‌م. حکیم ساغلام اولدوغومو سؤیلمیشدی. بس آرزولاریم نئجه اولاجاق؟ هان‌سی آرزولار؟ منیم داها آرزوم یوخ‌دور. یوخ... اولا بیلمز. فالچیلار هامی‌سی یالانچیدیرلار. فال دا، فال‌چی دا یالان‌دان، فیریلداق‌دان باشقا بیر شئی دئییل! قادینین تک مقصدی من‌دن پول قوپارماق ایدی... او منیم گلجیی‌می بیله بیلمز! کیم‌دیر، آخی، او؟ نوستراداموس؟ خئیر. هئچ کیم، هئچ کیم گله‌جک حاقین‌دا اؤنجه‌دن دقیق معلومات وئره بیلمز. قادین یالان دئییردی..

قورخو حسی تدریجا روحوما سیزیردی، اللریم سویویوردو، اورییم سیخیلیردی... داریخماق حسی تپه‌دن-دیرناغا منی بورویوردو. آنامین اؤلدویونو، یولداشیملا آیریلدیغی‌می هاردان بیلدی؟ نه اولسون کی، بیلدی؟ بلکه، بو محله‌ده یاشاییر، بلکه، قونشولاریم واسطه‌سیله ییغیب بو قدر معلوماتی... او، ایشینین پشکاری اولان بیر یالان‌چی ایدی. والسلام. اؤلومون زامانینی کیم‌سه قاباقجادان سؤیله‌یه بیلمز! ائوه چاتیب تئز بیر ایستکان سرین سو ایچدیم کی، بلکه بو واهیمه جانیم‌دان چیخ‌سین. فالچینین سیفتی، اوزون قارا بارماقلاری گؤزومون قاباغین‌دان گئتمیردی. "اوچ گون... اوچ گون..." سسی قولاغیم‌دا چینگیلدییردی. آج اولدوغومو بئله اونوتموشدوم. دیوان‌دا آرخاسی اوسته اوزاندیم، قولومو آلنیما سؤیکدیم، گؤزلریمی تاوانا زیللدیم. قادینی و باشیما گلن بو اجایب حادثه‌نی اونوتمالییدیم. هئچ بیر الاهیدده گوجو اولمایان، عادی بیر قادینین سؤزلرینه نیه بو قدر اؤنم وئریردیم؟ زامانی‌می بئله معناسیز، بوش شئیلره صرف ائتمملیدیم. گویا کی، شنبه گونو او پارکا گئدجکدیم؟ آخی گئتمه‌یه‌جه‌م. قادینین دئدیکلرینین فیکیرلری‌می آلت-اوست ائتمه‌سینی آنلایا بیلمیردیم. بلکه ده، هر شئی ساده‌جه زارافات ایدی. سویوق، یئرسیز و قورخونج زارافات. بو فیکیرلرله ایکی گونومو باشا ووردوم.

...یوخوسوزلوق‌دان اؤزومو او قدر یورغون حس ائدیردیم کی، ائوده‌ن چؤله چیخماغا تاقتیم یوخ ایدی. زامانی‌می اینترنت‌دن فیلم ایزله‌مکله کئچیریردیم. فالچینی و معشوم نیطقینی اونوتماق ایستییردیم. یئنه نووتبوکومو آچدیم، ایزله‌مک اوچون فیلملرین الکترون کاتالوقونا داخیل اولدوم، غریبه ایدی، هان‌سی فیلمی سئچدیم‌سه، قارشیما فرانسیزلارین مشهور "پاپیللون" او ("کپنک") چیخدی. بلکه ده اینترنت‌ده قاریشیق‌لیق وار ایدی. قالخیب ائوین ایچین‌ده گزمه‌یه باشلادیم. گوزگونون قاباغین‌دا آیاق ساخلادیم. ساچلاریم بیر-بیرینه یاپیشمیش و یاغلانمیش‌دی. چیممک اوچون حماما گیردیم، اما سویو آچمادیم. بیر آز حمام‌دا اوتوروب فیکیرلشدیم. آجلیق‌دان اورییم آغزیما گلیردی. مطبخه گئتدیم. سویودوجودا ایکی گون اول‌دن قالمیش پلوو وار ایدی. گؤتوروب حماما گلدیم و یئمه‌یه باشلادیم. حمامی داها گووه‌ن‌لی یئر بیلیردیم، بئینیم‌ده دولاشان فیکیرلرلردن سانکی بورادا اوزاقلاشیردیم. یئمیی بیتیره‌ن‌دن سونرا سویو آچدیم، سسینی دینله‌مه‌یه باشلادیم. کراندان آخان سویون شیریلتی‌سی نیاگارا شلاله‌سینین سسیمیش کیمی، قولاقلاری‌می دئشیردی. آیاقلاریمی سویون آلتینا توتدوم. سودان بوخار قالخیردی، اما ندن‌سه ایستینی هیسس ائتمیردیم، علیمله آیاقلاریما توخوندوم، بوز کیمی سویوق ایدیلر. سویو باغلادیم. هامام‌دان چیخدیم. آیاقلاریم ایسلاق-ایسلاق گوزگویه طرف گئتدیم. دوروخدوم.. گوزگوده اؤزومو گؤرمدیم. گؤزلریمی یوموب آچدیم... گوزگو قارشیمدای‌دی، اؤز یئریندیدی، گوزگوده عکسیم یوخ ایدی، گوزگو منی گؤسترمیردی... دئیه‌سه‌ن، حقیقتا سون گئجم ایدی... کیتاب رفینه ساری آددیملادیم، رفده‌کی کیتابلارین آدینی بیر-بیر اوخوماغا باشلادیم. بوکووسکینین "ماکولاتورا" اثرینی گؤتوروب ورقلدیم. بو کیتابی آنام هدییه ائتمیشدی. کیتابی بورنوما طرف قالدیریب ورقلرین قوخوسونو جیریمه چکدیم. آنامین یایلیغینین عطری گلیردی...

تاریخ
2019.08.27 / 09:58
مولف
آینوره مممدووا
شرح لر
دیگر خبرلر

عومور کئچیب قوجالمیشیق...

صمدین یادینا دوشدومو گؤزلرینین اتفاقی

آفرینیم همتی والایی-ستارخانه‌دیر- شعیر

و اؤزگور بیر قادین‌دیر سئودیین قادین، بونو دوشون - شعیر

ائشیت‌سه‌م گلیرسن، اوچارام، اینان- شعر

اوخو، بولبول، بلکه یاریم اویان‌سین!..- شعیر

گئدیرسن، سسین ده یاد اولسون باری...- شعیر

تهران‌دا بیر گئجه- حکایه- اوچونجو حیسه

سن قانسان، من اورک، آیریلمازیق بیز- شعیر

تهران‌دا بیر گئجه: ایکینجی حیصه - حکایه

خبر خطّی
 
Axar.az'da reklam Bağla
Reklam
Bize yazin Bağla