کولت. آذ اومید نجارینین ۲۱ آذر حرکاتینین خاطره‌سینه حصر ائتدیی "فال‌چی" حکایه‌سینی تقدیم ائدیر:

اولی بورادا

آیین سونون‌دا ائو ییه‌سی گلیب کیرایه حاقینی ایسته‌یه‌ن‌ده قاپینی آچان اولمایاجاق. بوتون کیتابلاریمی دیر-دیمزینه ساتیب، کیرایه پولونو گؤتوره‌جک. بوکووسکینین "ماکولاتورا" اثرینی اوستوم‌ده گؤتورمه‌لییه‌م. اجازه وئرمره‌م، آنامین یادیگاری، آنامین یایلیغینین عطرینی وئره‌ن کیتاب پولا ساتیلسین.

اوتوراجاغین اوستون‌ده مئییتی‌می کیم‌سه گؤره‌جک، یان-یؤره‌سینه باخاجاق، کیتاب‌دان باشقا هئچ نه تاپمایاجاق، کیتابی گؤتوروب ساخلایاجاق. بلکه ده، مزاریمین ایچینه قویوب منیمله بیرلیک‌ده باسدیراجاقلار. بو فیکیرلرله ساعتا باخدیم، دوز ایکی ساعت قالیردی اؤلومه. قالخیب دولابدان بیر دست یویولموش پالتار چیخاریب گئییندیم. کیتابی الیمه آلدیم، اوتاغیما سون دفعه نظر سالدیم. ائوده‌ن چیخیب یولومو او فال‌چی اوتوران یئردن سالدیم.

اورییمین درینلیینده بیر اومید قیغیلجی‌می سؤنمک ایسته‌میردی، فال‌چی قادین منی گؤرسه، بلکه یانینا چاغیراجاق، اوچ گون اول سنه دئدیکلریمین هامی‌سی یالاندیر دئیه‌جکدی.

اوزاق‌دان فالچینین اوتوردوغو یئره باخدیم. قادین یئرینده دئییلدی، اوستون‌ده اوتورماق اوچون یئره سردیی قالین کاغیذ پارچاسی اوزاق‌دان لکه کیمی گؤرونوردو. هاوا قارانلیغا ساری گئدیردی. بیلییم‌ده‌کی ساعت ۲۰:۱۵-ی گؤستریردی. اؤلومه دوغرو آددیملاییردیم. آیاقلاریم آلتین‌داکی یئری سانکی حس ائتمیردی، سرخوش آدام کیمی سنتیرله‌یه-سنتیرله‌یه یئرییردیم. عمروم‌ده آیاقلاریم بئله کئییممیشدی.

من بیر عؤمور آتئیست یاشامیشدیم، حتی بو دوشونجه ایله اؤزومدن باشقا چوخلارینا تأثیر ائتمیشدیم. ایندی هر هانسی‌سا بیر قوه آختاریردیم دعا ائتمه‌یه. دعا ائدیب دئیه‌م کی، کاش او بیری‌سی دونیادا الله اولماسین، یوخسا بو دوشونجه‌لریمین جزاسینی چکه‌جه‌م. گؤرونور، تانری دئییله‌ن آنلاییش محض چتین آنلار اوچون دیرلی ایمیش. ایندی من، بو چیخیلماز آنیم‌دا بیر قوه آختاریردیم، ائله بیر قوه کی، بوتون اورک سؤزلریمی اونا دئیه‌م. تانریسیزلیغیم کیمسه سیزلییم‌دن ده آجی ایدی... تانری‌سیز آخی اورییم‌ده کیمینله دانیشاجاقدیم؟ کیمه دئیجکدیم کی، "باغیشلا"؟ تانری سؤزو "باغیشلا" دئمک اوچون یارانیب!

آرتیق پارکا یاخینلاشیردیم. اوزاق‌دان آغاجلار، پیشه ورینین عابده‌سی گؤرونوردو. قاران‌لیق‌دا پیشه ورینین هیکلینین اوستونه ایشیق سالمیش‌دیلار و عابده گونش کیمی یانیردی. پیشه ورینین ساغ چینینه قارا بیر قارغا قونموشدو، هیکلین قاشلاری دویونلنمیشدی، صیفتینه سرت ایفاده حاکم کسیلمیشدی. ائله بیل، قارغا اونو ناراحات ائدیردی. سانکی هیکل بو دقیقه جانلاناجاق، الینی قالدیریب قارغانی قوواجاقدی. پارکا گیره‌ن‌ده هاوانین سویوق اولماسی جانیمی اوشوتدو. منه ائله گلدی کی، "پیشه وری" پارکی بو شهرین ایچین‌ده دئییلدی، باشقا بیر سویوق ایقلیملی اؤلکه‌یه عایید ایدی، هاواسی دا عایید اولدوغو اؤلکه کیمی بوز کسمیشدی..

فالچینین دئدیی آغاجی آختارماغا باشلادیم. دوققوزا اون دقیقه قالیردی.. سونونجو دقیقه‌لریم‌ده ده حیات‌دا گؤزل‌لیک تاپا بیلمیردیم. عمومیتله، دوستلاریم "حیات گؤزلدیر" - دئیه‌ن‌ده همیشه تعجوبلنمیشه‌م. آغاجی تاپدیم، او پارکین ان اوجا کوکنار آغاجی ایدی. اوجا کوکنارین رنگی پارکین او بیری کوکنارلاریندان فرقله‌نیردی.... ایلک دفعه ایدی کی، ساری رنگده بیر کوکنار آغاجی گؤروردوم. سانکی اونا دا دئییبلر کی، ساعت ۲۱:۰۰-دا اؤل‌جک‌سه‌ن، او دا کسیلمک، یا دا یانماق قورخوسون‌دان بئله سارالیبدیر.

کوکنارین آلتین‌داکی اوتوراجاغا یاخینلاشیب ایلشدیم. کیتابی یانیما قویوب ساعتا بیر ده باخدیم. اوچ دقیقه قالیردی... فالچینین اوچ بارماغی کیمی قورخونج و داریخدیریجی اوچ دقیقه... بدنی‌می سویوق تر باسیردی. آلنیم‌دا پوچورلانمیش تر دامجیلارینی کؤینییمین قولو ایله سیلدیم.

یوخ... بئله اوتورمامالییام. اوتورموش وضعیت‌ده اؤلسم، اوزوقویلو یئره ییخیلا بیلردیم. اوزانماق اؤلوم زامانی ان دوغرو اصول‌دور.