کولت. آذ اوشاق ادبیاتی سیلسیله‌سین‌دن زاهید خلیلین "پری و میری" حکایه‌سینی تقدیم ائدیر:

آنانین بتنینه ایکی اوشاق دوشموش‌دو. بیرینین آدی پری، او بیرینین آدی میری ایدی. میری چوخ ناراحات اوشاق ایدی. آنانین بتنین‌ده پرینی بیر کونجه سیخیشدیریر و دایم میزیل‌دانیردی.

- قیراغا چکیل، منیم یئریم داردیر.

یازیق پری نه قدر کنارا چکیلیردی‌سه، میری نارازی قالیردی.

گون کئچ‌دی، آی دولان‌دی، میری ایله پری آنادان دوغول‌دولار. اول میری، سونرا پری دونیایا گل‌دی.

میری دئدی:

- من بؤیوک قارداشام. سن‌دن بئش دقیقه تئز دوغولموشام.

پری دئدی:

- دوز دئییرسن، سنین سؤزون منیم اوچون قانون‌دور.

اونلار بئله‌جه بؤیودولر. میری نه دئدی‌سه، پری رازیلاش‌دی. او قدر بؤیودولر کی، آخیردا قوجال‌دیلار.

بیر گون ازراییل آدلی بیر جناب اونلارا قوناق گل‌دی.

ازراییل دئدی:

- ایکینیزدن بیرینیز منیمله گئتملیسینیز.

میری دئدی:

- باجی، بوتون اؤمروموز بویو من نه دئمیشه‌م‌سه، سن ائتمی‌سه‌ن. ایندی سؤزو سنه وئریرم.

پری دئدی:

- جناب، منی اؤزونوزله آپارا بیلرسینیز. چونکی میری اؤلسه، ائله حساب ائدین کی، من ده اؤلموشه‌م. اما من اؤلسه‌م، میری بو دونیادا هله یاشایا بیلر.

ازراییل دئدی:

- همیشه میری دئیه‌ن اولوب. اما بو دفعه من دئیه‌ن اولاجاق.

جناب ازراییل پرینین گؤز یاشلارینا باخمادی. میرینی اؤزو ایله آپاردی. اما جمعی بئش دقیقه‌دن سونرا قاییت‌دی و دئدی:

- میری او بیری دونیانی داغی‌دیر. سن گئتمه‌سه‌ن، ساکیتلشمه‌یه‌جک.

پری سئوینه-سئوینه ازراییلین دالینا دوش‌دو.