آنا صحیفه ادبیات |
کولت. آذ بختیار واهابزاده نین "سن هاردان بیلهسهن..."آدلی شعیرینی تقدیم ائدیر:
سن هاردان بیلهسهن نه چکیرم من؟...
پاییزام...
ای عمرون ایلک باهارلیسی،
سن هاردان بیلهسهن، ندن بیلهسهن
یوخدور بو دونیادا سندن وارلیسی.
دومان تک داغلارا چکیلهن منهم،
بوداقلار اوستونده قوش تک دینهن سن.
پاییزدا یارپاغی تؤکولهن منهم،
عمرون یاز چاغیندا چیچکلنهن سن.
ایللریم خرجلنمیش، عؤمور گؤدلمیش،
سنین یول گئدهسی چوخ ایللرین وار.
منیم اورییمده باش-باشا گلمیش
کؤورک دویغولاردان نه خبرین وار.
دئییرسن، اوجاغین کؤزو منهم، من،
سنسه توستولنهن خاطرهلرسهن.
آنجاق خاطرهمی؟ سهوین وار سنین،
داغدان خبرسیزدی آرانداکیلار.
بیر ده... اونوتما کی، توستولنهنین
تزهدن توتوشوب آلیشماسی وار.
سن هاردان بیلهسهن، سئودا آنلاری
قنیمت پاییدیر توکهنهن عمرون.
سیسقا بیر بولاغین سون دامجیلاری
داها شیرین اولور تشنهلر اوچون.
سن هاردان بیلهسهن، آخشام شؤلهسی
نیه آینالاری آلوولاندیریر.
سن هاردان بیلهسهن بولبولون سسی
نیه سون باهاردا اورک یاندیریر.
آرتیر زامان-زامان واختین قیمتی،
آرزو مین هوسده، اورک تلاشدا.
سن هاردان بیلهسهن، گؤزون لذتی
قلبین آغریسینا دؤنور بو یاشدا.
سئوگی یاش تانیمیر... قلبینی یاندیر!
یاناراق یاشاسان، یاش دوشمز یادا.
سئوهن دوخسانیندا هله جاواندیر،
سئومهیهن قوجادیر اوتوزوندا دا.
اورک آلیشیرسا، گوناهکارمی یاش؟
سئوهنی قیناما، سئوهجک سئوهن!
یاش ایله اوریی دئییل، آ قارداش،
بوش ایله دولونو چکییه قوی سن!
بیر اؤمرو ایللرله اؤلچمک دوز دئییل،
عؤمورله ایللری اؤلچهسهن گرک.
هیسسینله، قلبینله دینله نه دئییر،
بو دویان، بو یانان، آلیشان اورک...
یاشارکهن حیاتی حیاتی سئویرم...نه قم،
اؤلرکهن اؤلومله سئویشهجهیهم...
تاریخ
2019.08.29 / 19:28
|
مولف
آینورا مممدووا
|