اولی بوراق‌دا

رؤوشانه‌نین بدن قورولوشون‌داکی موکمل اینجه‌لیک، اوزون‌ده‌کی «معصوملوق»، شیرین، بالاجا اوشاغی خاطیرلادان گولوشلری، عشوه‌سی، ساچلاری، دوزگون یئریشی، اود آلوو ساچان گؤزلری، چوخونلوقلا تورک قادینینا مخصوص اولان غنچه دوداقلاری، گیرده بوردو، خیردا قولاقلاری و حزین مئلودییانی خاطیرلادان سس تونو، یئددی آرخا دؤنه‌مینین فارس اولماسینا باخمایاراق، گؤرنده آدامی چوخ دوشونوردو. صرف بونا گؤره او، شهرده هر کسله دئییل، اؤزو ایستدیی، سئچدیی آداملارلا گؤروشوردو. کیم‌لیگی، هارادان گلدیی مجهول اولان بو گؤزلین بو گونکو «قوناغی» دا آیخان ایدی.

دوز سحره قدر تانرینین اینسانا بخش ائتدیی بوتون گؤزل‌لیکلری بیرجه-بیرجه یاشادیلار، حس ائتدیلر، دویدولار. هئچ واخت، هر آدامین باشینا گلمه‌یه‌ن سئهرلی، معجزه‌لی بیر گئجه اولدو بو گئجه. آیخان کیفایت قدر جین‌سی علاقه یاشامیش بیری اولسا دا رؤوشانه‌نین اونا اوینادیغی، بو سیرلی «عشق اویونو»-نو عمرونده گؤرممیش، دویمامیشدی و اؤلنه قدر ده اونودا بیلمه‌یه‌جکدی.

گون چیخانا قدر بوتون عضله‌لری، سینیرلری بوشالان آیخان، سحر چاغی آرتیق محکه‌م یوخویا دالمیشدی. هله ده عشوه‌سین‌دن، احتیراسین‌دان قالمایان، «سویومایان» رؤوشانه ایسه پنجره‌دن اوزرینه دوشه‌ن گونشین قیزیلی شعالاری آلتین‌دا «برق وورور»، گونش کیمی گولومسییر، هوسله و ماراقلا اؤز «یارینا» باخیردی. بیر الی محتشم ووجودونو تومارلاییر، بیر علی ایسه موبایل تلفن‌دا «کشفیات ناظرلیگی»-نین نمره‌سینی ییغماغا حاضیرلاشیردی. گؤزونون بیرینده احتیراسین اونا بخش ائتدیی شنلیک، بیرینده ایسه کدر واردی. او کدرینسه سببی آرتیق معلوم ایدی.

رؤوشانه ایران کشفیات ناظیرلیینین خصوصی امکداشی ایدی. بو یوللا او، بلکه ده یوزلرله گناهسیز، ایرانا صرف دینجلمه‌یه گلن، هر هانسی غیری-سیاسی سببله تدبیرلره و گزیلره قاتیلان قوزی آذربایجان تورکلرینی بادا وئرمیشدی. کیمی‌سی سحر اونون آغوشون‌دا اویانان کیمی ناظیرلیین خصوصی عملیات قروپو طرفین‌دن حبس ائدیلیر، کیمی‌سی - اؤزللیکله «جدی تهلوکه» حساب ائدیله‌نلر اونون ائوینه واریر-وارماز توتولور، بعضیلری ایسه ائله «گئجه» باشلایان آنداجا گوله‌لنیر و یا بوغدورولوردو. آنجاق بو دفعه دئیه‌سه‌ن وضعیت باشقا حال آلمیش‌دی.

بوتون حیاتینی پان‌ایرانیزمه، آریا تعلیمینه و س. قوربان وئره‌ن بو بیچاره گؤزل بو دفعه یا ائتدیی سایسیز حساب‌سیز جینایتلردن بئزمیش، یا دا آیخانا دلیجه‌سینه عاشیق اولموشدو کی، موبایل تلفن‌دا «کشفیات ناظرلیگی»-نین نمره‌سینی ییغماغا حاضیرلاشان الی هیجانلا تیترییر و عمومیتله تلفنو یئره چیرپماغا حاضیرلاشیردی. بیر طرف‌دن ویجدان، بیر طرف‌دن دیگر اینسانی دویغولار و گئجه‌دن بری سویومایان، بدنینین هر ذره‌سینی یاندیران احتیراس حسی رؤوشانه‌یه غالیب گلدی. یوزلرله تورکون «ائوینی ییخمیش» بو «پئشکار» فارس قادینی بو دفعه کیملیینی، اصلینی، سیاسی دوشونجه‌سینی بئله یاخشی بیلمدیی آیخان آدلی بو تورک کیشی‌سینه مغلوب اولموشدو. آرتیق آخشامکی حیله‌گر باخیشلاردان، آلدادیجی حمله‌لردن اثر علامت قالمامیش‌دی. رؤوشانه ایندی سس‌سیز-سمیرسیز، هر شئی‌دن خبرسیز آغوشوندا یاتان آیخانا، تمام صاف دویغولارلا، حقیقی معصوم باخیشلارلا باخیردی. ایچین‌ده ایسه بیر-بیرینه عکس ایکی روح مباریزه آپاریردی؛ شووینیست، ایدئالیست، قددار بیر قادین و چاره‌سیز، ویجدانینا یئنی‌لن، یازیق فارس قادینی...

گونورتایا یاخین اونلار آیریلدیلار. آیخان رؤوشانه‌نی سون دفعه اؤپدو و یئنه گلجیی باره‌سین‌ده اونا ود وئردی. رؤوشانه ایسه کؤورلمیش، یارین‌دان آیریلدیغی اوچون بالاجا اوشاق کیمی آغلامسینیردی. آیخان بیر داها و سون دفعه اونون گؤزلرینین ایچینه باخدی. بیر آنلیق سانکی اوردا حیله‌گر، یالانچی بیر عفریته گؤردو. آنجاق رؤوشانیله یاشادیغی محتشم و اونودولماز آنلار، ان اساسی تورک هومانیزمی اونا غالیب گلدی. ساده‌جه ایکی تانیش، ایکی دوست، ایکی معشوق کیمی آیریلدیلار. آیخان اونونلا بیر داها گؤروشوب-گؤروشمیجیی حاق‌دا اؤز-اؤزونه ترددود ائدیردی. لاکین رؤوشانه آیخانی بیر ده گؤرملیدی، مطلق. بو ایل ده اولماسا گلن ایل... آنجاق دئیه‌سه‌ن اونلار گؤروشه‌جک‌دیلر...

ایکی ساعت سونرا او، آرتیق نؤوبتی گؤروش حاق‌دا دوشونوردو. بیر گؤزو ایسه یئره دوشموش موبایل تلفنون اکرانین‌داکی «کشفیات ناظرلیگی»-نین نمره‌سین‌ده قالمیشدی...