تانینمیش گونئی‌لی شاعر محمد چالغین ۱۹۷۷-جی ایل مارتین ۲۱-ده تبریزده آنادان اولوب. شعیرلری تورکدیل‌لی اؤلکه‌لرده منتظم اولاراق درج اولونور.

کولت. آذ محمد چالغینین یئنی شعیرلرینی تقدیم ائدیر:

یوخولاریما یاپیشیر

عطرینی یورغانیما سپیر

اؤزونو پالتارین‌دان چیخاردیب اوستومه آتیر

اوچوقلادیر دوداقلاری‌می

بیر قیزدیر، آدینی بیلمیرم.

آینا

ساعت

اللی بئش، اوتوز ایکی دقیقه، اون بیر ثانییه

او چیراغی سؤندورون لطفاً

ایشیق بارماقلارینی گؤزومه سوخور.

آلنیمین ساغ طرفینه باخیرام...

ساچلاریم سول طرفدن تؤکولوب، دئیه‌سه‌ن.

سول اوووردوما باخیرام

اوزومون ساغ طرفی چؤکولوب، دئیه‌سه‌ن.

ساغ الیم‌ده سیگارام

ینی،

سول الیم‌ده

بارماغی‌می اوزادیرام سول گؤزومه

یعنی

ساغ گؤزوم سوخولور بارماغیما

من، بوردایام هله

ائویمین ایچین‌ده

ساغی سول گؤروره‌م

آینادا.

یوخسوللوق

کیشی،

زیبیل‌خانالاردان ییغدیغی اشیالارلا ائوه دؤندوکده

سن،

اونلاری آییرارسان

نئجه کی، آییریر سنی...

تلیسلره دولدورارسان سونرا

نئجه کی، اوشاقلارینین جیبلرینه دولدورورسان...

صاباحا یاوان‌لیق دا یوخ‌دور، بیلیرسن

ساتارسان اونلاری

نئجه کی، ساتیر(سن)آرخا کوچه‌لرده...

سونرا بو شئیرده

بوش یئرلره یازا بیلرسه‌ن

یوخسوللوق.

سن‌دن گؤزل

هر گون

بیرازجا سلام

بیرازجا نئجه‌سه‌ن

بیرازدان...

هله‌لیک!

بو مامیله اوزون سوره‌جک، آلچا گؤزلوم!

منی کاریخدیرما!

او قوماشین آلتین‌دا کؤلگه‌لنه‌ن لیمونلار

منیم آغزیمی سولاندیرمادان

نئجه قورویا بیلرلر؟

اینینده‌کی کؤینیینی چیخارتسان

گؤررسن کی، سن‌ده‌کی گؤزل‌لیکلر

سن‌دن گؤزلدیر

صحبتین سونو

بیر مئساژ یاز...