کولت. آذ مبارز سلیمانلینین "تبریزیم" شعیرینی تقدیم ائدیر:

خال‌لی جیران اوتلایان‌دا دوزونده،

کدر گؤردوم تبریزیمین اوزون‌ده.
آیریلیغین حسرتی وار گؤزون‌ده،
اورکلری داغلایاندی تبریزیم.

ائینلیداغ بویلانان‌دا سهنده،
بزز قالاسی ایتر دومان‌دا – چنده،
توپخاناداغ تالعین‌دن کوسنده،
هؤنکور-هؤنکور آغلایاندی تبریزیم

بیر تاریخ‌دی هر قایاسی، هر داشی،
تانریم بیلیر نلر چکیب‌دیر باشی،
ساوالانیم باباداغین قارداشی،
بولاقلارین چاغلایاندیر تبریزیم.

یازیلیب شاءنینه مینلرله داستان،
آنا یوردوم باش‌دان-باشا گلستان،
ماکی قدیم تاریخ، میانه اوستان،
شبوستر، خوی، کندیوان‌دیر تبریزیم.

دره‌لری بوروننده دومانا،
گور چایلاری سسین سالار هر یانا،
دوزلرینده لاله بیتن موغانا،
اومیدینی باغلایاندیر تبریزیم.

چالدیران، اورمییه، اردبیل جاندیر،
اهر ،قزوین، هئریس، ساراب، زنجان‌دیر،
منیم آنا یوردوم آذربایجان‌دیر،
برابرین اولمایان‌دیر تبریزیم.

دولانمیشام قاراداغ محلینی،
چوخ دادمیشام کولشلینین بالینی،
خلیللینین سوروشدوم اهوالینی،
چیچکلرین سولمایان‌دیر تبریزیم.

گلن قوناق کلیبری سوراقلار،
بهروزومدا دیشچاتلادان بولاقلار،
مزگر، بالان، آینالی‌دا وار باغلار،
دمیرچی کند مرد دایاندی تبریزیم.

دیلدن دوشمز شهریارلا، شیرازی،
کؤنول اوخشار ماراغانین هر یازی،
یادا سالسان غم‌لی آخان آرازی،
مبارزی تئز دویاندی تبریزیم.