کولت. آذ صابیر روستم‌خانلینین "ساغ اول، آنا دیلیم" آدلی شعیرینی تقدیم ائدیر:

یوللاریم سینان‌دی یاد اؤلکه‌لرده،
نئچه یاد دوداق‌دا سسلندی آدیم.
ساغ اول، آنا دیلیم، منی هئچ یئرده
کؤمک‌سیز قویمادین، یالقیز قویمادین.

بارماغیم آلتین‌دا دویمه فیرلانیر،
لوندونلا، پاریسله یاناشی باکی…
دوغما سؤزلر اوچون داریخان هانی؟
دئیین قوی دینله‌سین: "دانیشیر باکی!"

دانیشیر، آچیلیر اؤمرون باهاری،
دونیایا من اونون قوینون‌دان اوچدوم.
منیم اورییمین آنتنالاری
گؤزل آذربایجان دیلینه توشدو.

دؤیوش‌ده قیلینج تک سییریلدی قیندان،
باشیمین اوستون‌ده بایراغیم اولدو.
تورپاغیم ایکییه بؤلونن زامان
بو دیل بؤلونمه‌یه‌ن تورپاغیم اولدو.

اوتان‌سین تاریخه دللال‌لیق ائد‌ن،
تاریخ قاپی‌سینا آچار سؤزلر وار.
پردنی قالدیرسان، بئش-اون کلمه‌دن
قوندارما جیلدلر تار-مار اولار.

بو دیل‌ده سئوینجیم، قمیم، کدریم
تزه اومیدلره آچیلان سحر.
بو دیلین رئاکتیو طیاره‌لری
آراز سرحددینی قیران کلمه‌لر.

ایپک نغمه‌لریم گوللباتمازدی،
قولونو قانداللا باغلاماق اولماز.
بو تای‌دان او تایا آرخایین کئچه‌ن،
او تای‌دان بو تایا آرخایین کئچه‌ن

دیلین سندینی یوخلاماق اولماز،
سئوگینین یولونو ساخلاماق اولماز!
ساغ اول، آنا دیلیم، آنا اؤیودوم،
فضولی عشقین‌دن دیوانه دیلیم.

اورییم باشینا نفس درمه‌دن
فیرلانیب کول اولان پروانه دیلیم.
هانی خانیم چایلار، هانی بی گؤللر،
دیللرده جوجره‌ن یوردون ایزی‌دیر.

یوز یول یارالانمیش دوغما کلمه‌لر
خالقیمین دؤیوشلر خریته‌سی‌دیر.
آلا داغ، قارا داغ…دی سئچ، دی آییر،
داغلاری باسیلماز اوردوم سانمیشام.

هاردا بیرجه کلمه سؤزوم یاشاییر،
اورانی حالالجا یوردوم سانمیشام.
اوستونه یویوردو قوران دیللری،
پیغمبر دیللری، قانون دیللری…

قاپیلار دالین‌دا قوی‌دولار سنی،
حاق دئدین، دابان‌دان سوی‌دولار سنی،
آنجاق محو اولمادین، آنام، جان دیلیم،
اوردولار سارسی‌دان قهره‌مان دیلیم!

حمروم قیریلمازدی، یول قیریلسا دا،
سنینله همیشه من اوزواغام.
بدنیم تورپاغا تاپشیریلسا دا،
روحومو من سنه تاپشیراجاغام...